Allawig, dinuprakna kabalbalayan; ina, 6-bulanna nga anakna, naitayab

SAN VICENTE, Ilocos Sur -Ibilang ti maysa nga ina a milagro ti pannakaisalakan ti innem a bulan nga anakna kalpasan nga intayab ti allawig a nangdalapus iti kabalbalayan ti Sitio Ermita, Barangay San Sebastian ditoy nga ili idi Agosto 21.

Nupay agkinkintayeg pay laeng ni Maricel Ragasa gapu iti napasamak, nagyaman iti Dios ta nakalasatda ken ti anakna a ni Louie, Jr., 6-bulanna, kalpasan nga intayab ida ti allawig a nangduprak ken nangitayab iti bubong dagiti kabalbalayan ditoy a lugar.

Napasamak daytoy bayat ti matutudo a tiempo nga insangbay ni Bagyo Ineng iti Amianan a pakairamanan ti Ilocos Sur.

Awan met ketdi ti naireport a casualty iti napasamak.
Kas insalaysay ni Maricel, aggagao iti kanenda ken ti inauna nga anakna idi kellaat a simmiplag ti napigsa nga angin.

“Ti anakko (Louie) ti immuna a napanunotko, isu a dagus nga immunegak iti balaymi,” kinuna ni Maricel bayat ti pannakiinnuman kenkuana ni Jun Ramos, anchorman iti Barangay Commando a naipatangatang iti DWRS.

Segun ken ni Maricel, naigalut ti nalaga iti kawayan nga indayon ti anakna iti bubong ti balayda ket karaman daytoy idi intayab ti allawig ti bubong, karaman ti galba nga atep ti balayda.

Kinuna ni Maricel a naiggamanna ti indayon a nakaipaiddaan ni Louie ngem dina nabaelan nga inggawid gapu iti kinapigsa ti angin ket karaman a sinultop nga intayab ti agpuspusipos nga angin.

Naruros ni Maricel ket naipurruak kadagiti naidaluson a galba a nakadunoranna.

Naidaknir met ti galba a nakaikuyogan ti anakna iti sanguanan ti balay ti katuganganna.

“Naipasikig ti galba ket nagbibitin ti indayon,” kinuna ni Maricel iti panigergeren a timek.

Nagpaarayat ni Maricel kadagiti kaarrubada ket dagitoy ti nangibaba iti anakna.

Naipan dagiti agina iti balay-pagagasan para iti pannakataming dagiti sugatda.

Nagsagrap ni Maricel iti dunor iti sakana idinto a nadunor ti bibig ken timid ti ubing. Nupay kasta, saan a nakaro ti sugat ti ubing. (Tawid News Team)