CANDON CITY – Ginasut dagiti agindeg ditoy ken kabangibangda ti naipaayan ti libre a konsultasion, agas ken operasion iti naisayangkat nga Aloha Medical Mission iti Candon City Hospital ditoy siudad idi Enero 9-13.
Nasurok duapulo a doktor, nurses ken lay volunteers, malaksid laeng dagiti doktor a lokal ti nagtitinnulong a nangisayangkat iti Aloha Medical Mission.
Naisayangkat dagiti major ken minor operation kadagiti gusing, dagiti addaan katarata, malaksid laeng iti libre a medical check-up kadagiti agindeg.
Naikkan pay iti prosthetic arm ti aganay 20 a pukol.
Daytoy ti maikadua a gundaway a naisayangkat ti Aloha Medical Mission babaen ti initiatibo ti gobierno ti siudad nga idadauluan ni Mayor Allen Singson ken iti panangbayabay ni City Administrator Grace Singson.#