Aloha Medical Mission, naisayangkat iti Candon City

CANDON CITY – Nasurok a sangaribu ket uppat a gasut a pasiente ti sinerbian ti Aloha Medical Mission  a naisayangkat ditoy siudad manipud Enero 9 agingga iti 13.

Iti lima nga aldaw a medical mission a naisayangkat iti Candon City Hospital, 39 ti naoperaan iti cataract, 29 ti nagdalan iti major operation, 9 ti naikkan iti prosthetic arm, 64 ti naglasat iti minor operation ken 1,337 ti natsek-ap ken naikkan iti libre nga agas.

Indauluan ni Dr. Ignacio Torres dagiti bisita a doktor, narses, pharmacists ken volunteers idinto nga indauluan ni Dr. Candonino Gazmen, medical director ti Candon City Hospital, dagiti lokal a doktor a timmulong  iti pannakaisayangkat ti nasao a medical mission.

Immuna idi 2009, daytoy ti maikadua a gundaway a naisayangkat ti Aloha Medical Mission ditoy siudad.#