Alpabeto

Sarita ni Errol L. Abrew

 

KALKALPAS ti padaya ti Silver Wedding Anniversary dagiti agassawa nga Agah ken Menggay.  Addadan iti uneg ti kuartoda iti hotel nga inregalo ti inaunaan nga anakda nga adda idiay Canada. Agkaapaan dagitoy nga agassawa.  Pisces ti lalaki, Virgo met ti babai a kuna ti horoscope a saan a compatible. Ngem ti nakaskasdaaw, no apay a nakapagpaut ti matrimoniada iti uneg ti uppat a pulo a tawen.  Makuna a no pammadayaw koma a ket Most Outstanding in Durability metten ti kalagda ken kapaut dayta a relasion.

Ania met ti sikretoyo ngay mare? dinamag naminsan ti kumare ni Menggay a ni Mauricia.

Give and take, kumare, ingingirsi ni Menggay.

Ngimmato dagiti kiday ni Mauricia.  Kasla dina nakaut ti kayat a sawen ni kumarena. Kayatko a sawen, mare Asiang, no agapakami a ket no sino ti immuna a nagpungtot a ket bay-anmi lattan nga iyebkasna amin.  Ket kalpasanna, ti simmippaw, isun ti agpakalugi nga akimbasol tapno di dumakkel ti riribuk.

Kasta? masmasdaawan ni Mauricia.

Ken SOP, Standard Operating Proceduremi a sakbay a maturogkam’ a dua iti rabii, narisutmin amin nga ap-apa.

Imbag man, kumare, kasta koma met kadakam’ ken ni Ittong. Wen, mare, datay kunadan idiay Biblia, no barsakendaka iti bato, barsakem ketdi iti tinapay. Imbag a ta kastakay a dua, kumare. Dakami ken ni Ittong sabali, inlibbina.

Ta apay kasanokayo met? Apuy kontra apuy met pamay-an ni Ittong, mare, insennaay ni Mauricia.  Ta ti istilona, a sangkakunana, kadagitoyen kano a panawen, sabalin, saanen nga uso dagita labing-labing.

Ta apay met?

Wen a, mare, ta kadagitoy kanon, no barsakendaka iti bato, barsakem met iti bato.

Nagalasen.  Ket kasanon?

Ngem into kanon no madamayon a depdeppelan ti kusay dagiti bukolyo, sakayto kano mangan iti tinapay.

Naloko met ata nga Ittong a.

Ket isinamon a.

Lab ko met ngarud, mare, ta no kabulananna ket maanusanna met ti aglaba ken agplantsa no awan pasadana ket madama met tong-itko.  Ngem makadlawak san ta nangpapintor man met ti adda idiay baba ti bumper ti jeepna nga sticker.

Sticker?  Ania nakasurat idiay?

Kunanaman:  Awan serserbi ti gaget no managtong-it ni baket.

Afuka met aya, Asiang.  Isardengmo met ngamin a sagpaminsan dayta tong-itmo, ta ne kanayon met upermon.

Ngem idi kalman, sinabalianna metten, mare Menggay.

Ania ingkabilnan ngay?

Kastoy metten, mare:  Awan serserbi ti gaget no maymaysa ti baket.

Ay, ket agsiputkan a mare, narigaten.  Dimo la ket mapabasol no nayonannakan ta kanayonka met nga awan no tiempon panagpalitnawna.  Masapul koma a, nga agkinnudkodkayo ta kasta ti sikreto ti napaut a relasion.

AY WEN, Agapito, malagipko, nakuna ni Menggay, idi nakaiddadan, kalpasan iti uppat a pulo a tawenta, kasanonak met nga idiskribir ngay? sinaludsodna.

Unaykan aya, Dominga, apay, masapul pay la kadi a saludsodem? nakuna ni Agah.  Ngem apagapaman laeng ta nalagipna datay seminarda iti marriage counseling idiay Couples for Christ: give and take, pinnabus-oy. Kastonay my dear, uray la dumanon lapayag dagiti isemna.  Sika, para kaniak ket A, B, C, D, E, F, G, H, I, J, K.

Ania ti kayatmo a sawen, honey? Inalpabetonak metten, ket uray la napikapik ti kasta unay ni Menggay a naguray no ania ti sumaruno a sawen ti asawana.

Sika ket Adorable, inay-ayatko gapu iti kina-mannakaawatmo kas asawa, inrugi ti lalaki.

Siempre a, ingkidday ni Menggay.

Intuloy ni Agapito: Beautiful, gapu ta iti panagkitak ket pulos a saan a nagkupas ti kinapintasmo uray maris asin ken pamientan dagiti buokmo ngato-baba.

Pulimi ti napipintas, impasindayag ti babai.

Capable, ta uray menopausekan ken Sahara Desert metten ti inaladam ket mayatka pay laeng nga akmen ti pagrebbengam kas asawa.

Kinuddot ni Menggay ti bakrang ni Agah.

Desirable, ta uray no pagat-pusegmon dagiti sangaparis a munturodmo ket agkulagtit pay met la datoy rugsok no makitak ida.

Ipa-bust liftkonton next month, immulagat ti babai.

Elegant, ta uray no kimbeten dagiti piskel ti rupam ket narangen ken nabursi pay met lat’ panagbadbadom ken pakabuklam lalo no adda paspasken.

La wen, la ipa-plastic surgerykon, kas nakuna ni Charee.

Foxy, ta namantenermo ti sippukel ti pammagim numan pay medio pangmatrona metten ti lukmegmo.

Liposuction la a bassit, agsubli man ti pigurakon, insalpika ni Menggay.

Gorgeous, ta adu pay la atiwem nga ub-ubing ngem sika no pakabuklan laeng, uray pay ni Mayyang.

Apo nga isem ta Menggay.

Hot, ta uray no bumaketkan ket datay kunadan dagiti Anggalog a may asim pa rin, adda pay la alsemna.

Napagarikgik ti babai. Kasta kadi honey?  Ayna, malmesak metten iti ragsak ken rag-o kadagita nga imbagbagam.  Agpayso kadi? uray la ideppel ni Menggay ti rupana ken ni lakayna.

Wen my dear, agpayso amin dagidiay.

Ket daydiay ngay I, J, K?  Ania ti kayat a sawen dagidiay?

Bimmangon ni Agapito, insuotna ti pajamana sana sinango ni baketna. Bimmangon met ni Dominga.  Indalikepkepna ti pagturogna.  Nagtugaw ni Agapito iti iking ti katre.

Ti I, J, K, my dear ket I’m Just Kidding! ingngirsi ti lalaki.

Kellaat a ginammatan ni Menggay ti nakapuesto a lamp shade ket imbarsakna ken ni Agah.  Imbuatit metten ti lalaki ti timmaray a rimmuar iti kuarto.

Ni inam, agsublika! inlaaw ti babai.  Kunakto pay, pulika a talaga ti bulilikong, inyissiagna ket sinurotnan ti lalaki.

Nasabat ti agronronda a house detective a madama nga agkinkinnamat iti pasilio iti dayta a parbangon iti maika-uppat a pulo a tawen sipud pay nagkallaysada nga agassawa a senior citizens iti agkaapaan, give and take a diarda.

(*Kilawen ket maysa a genre iti makunkuna a short short fiction or sudden fiction, ababa nga ababa a sarita.  Sarita nga aglaon iti di nasursurok ngem sangaribu a balikas, maitutop ita a panawen ti Twitter ken Facebook.  Awisenmi dagiti mannurat nga agipatulod met itoy a benneg ti Kilawenda.  Mangipatulodda koma iti ladawanda. – Editor).