Alternate route, maipasdek

VIGAN CITY – Addanton alternate route dagiti estudiante a mapan agbasa iti Divine Word College a saandan a sumrek pay iti Plaza Burgos no agmata daytoy a proyekto ti gobierno ti siudad.

Kinuna ni Konsehal Juan Carlo Medina a proyekto ti siudad ti pannakatuping ti karayan iti likud ti Arsobispado, DWCV ken Mart One santo maaramid a maintenance road ti agarup 3-5 metro nga islet a bagi ti publiko tapno adda pagdalanan dagiti lugan nga agitulod iti estudiante iti DWC.

Rummuar ti nasao a kalsada iti likud ti Aniceto Mansion a sumalpot iti Quirino Boulevard.

Kinuna ni Medina a no malpas ti nasao a proyekto, agbalin daytoy nga alternate route a sumrekan dagiti estudiante iti DWCV a saandan a magna pay iti plasa a puon ti pagproblemaan iti trapiko.

Inlawlawag ni Medina a no matuping ti karayan, kasapulan ti maintenance road a pagnaan dagiti lugan ti DPWH a mangmonitor iti nasao a proyekto ti river control ket mabalin ti kalsada a luktan a kas alternate route para iti DWCV.

Segun ken ni Medina, addan inisial a koordinasion ti gobierno ti siudad iti DPWH babaen ken ni Secretary Singson ket impatalged daytoy nga ibirokanda iti line budget daytoy a proyekto.

Manamnama pay ti pannakaipatakder iti rangtay iti akindaya a dike, a kaarngi ti rangtay iti nagtengnga a Govantes Dike nga itrabaho met laeng ti DPWH.

Kinuna ni Medina a mabusbos ti nasurok a P20 million iti laeng pannakatuping ti karayan agsipud ta malaksid a nangato, masapul a magaburan pay.

Kabayatanna, naammuan ken ni Medina nga ikorkordinar pay ti gobierno ti siudad ti panangpundo ti DPWH iti kalsada iti lauden ti Karayan Mestiso.

Natuping met ti nasao a lugar kas paset ti river control ti gobierno ti siudad ket addan rough road manipud iti rangtay ti Pagpandayan agingga iti rangtay iti Beddeng Laud.#