Alternative Learning System, nairusat para kadagiti balud

TAGUDIN, Ilocos Sur – Nasurok a tallupulo a balud ditoy ti agadal babaen ti Alternative Learning System ti Departamento ti Edukasion, daytoy ti impakaammo ti coordinator daytoy a program.

Kinuna ni Dr. Rowell Garcia, coordinator ti Alternative Learning System ti DepED, a tallupulo ket tallo a balud ti agadal iti babaen daytoy a programa bayat ti simple a programa a naangay iti Tagudin Gymnasium idi Agosto 23 ditoy.

Kanaig daytoy, nairusat ti Basic Literacy and Accreditational and Equivalency Programs para kadagiti balud ditoy nga ili tapno maikkanda iti gundaway nga agadal ken maaddaan iti diploma bayat ti panangikaroda iti basolda iti pagbaludan.

Kinuna ni Garcia nga agbasa dagiti nasao a balud iti sangapulo a bulan ket inton agturposda, makaawatda iti certificate of completion.

“Saan amin a balud ket nakaturposda iti elementaria ken sekundaria… ikkantayo ida iti gundaway tapno maaddaanda iti diploma babaen ti Accreditation ken Equivalency,” kinuna ni Garcia

Innayon ni Garcia a dagiti di nakatadog iti eskuela ket masursuruanda nga agbasa ken agsurat.