Ama, binagsolna ti anakna

CABUGAO, Ilocos Sur – Kayat ti anak nga iruar ti traysikelda ngem saan nga impalubos ti ama a puon ti nagsubanganda ken nangbagsolan ti ama iti anakna.

Segun iti report manipud iti polis ditoy, binagsol ni Ely Tabangcura Gonzales, 53, naasawaan, tricycle driver, ti anakna a ni Dennis Dolores Gonzales, 23, baro, agpadada a residente iti Barangay Arnap ditoy nga ili idi rabii ti Nobiemre 21.

Mapapati nga ipapilit ni Dennis nga iruar ti traysikel ngem gapu ta nabartek, saan nga impalubos ni Ely ket nagsubangda nga agama a nakapungtotan ti ama ket binagsolna ti anakna.

Boluntario a simmuko ni Ely Tabangcura idinto a naitaray iti Suero General Hospital ni Dennis.#