Ama, dinan idarum nakaatal iti anakna,

SUYO, Ilocos Sur – Saanen nga idarum ti ama ti nakaatal iti agtawen iti dua nga anakna iti baet a nagresulta iti pannakatay daytoy.

Aksidente a naatalan ni Rudy Mar Laventa y Lacundazo, 27, residente iti Sitio Kinapian, Suyo Proper, Suyo, Ilocos Sur ni Mark Jacob Bas-ilan, agtawen iti dua, idi agarup 9:30 ti bigat ti Abril 17 bayat ti panangiruarna ti passenger jeep iti garahe.

Mapapati nga agay-ay-ayam ti ubing iti likudan ti dyip ngem saan a nakita ni Laventa idi isanudna ti lugan a puon ti nakaatalanna.

Nagsagrap ti ubing kadagiti dunor iti nadumaduma a paset ti bagina ket intarayda iti Tagudin General Hospital ngem impakdaar ti doktor a nangtaming kenkuana a dead on arrival.

Ngem nagpirman ni Augusto Bas-ilan y Langwas, ama ti ubing, iti apidabit a saanen nga interesado nga agipila iti kaso kontra ken ni Laventa.#