Ama, dinangran ti nabartek nga anak

BANTAY, Ilocos Sur – Arak ti ramut ti panagsubang dagiti agama a nagresulta iti panangdangran ti anak iti amana idi rabii ti Hunio 16.

Naireport a naiyospital ni Robelio Unite y Viloria, 54, gapu iti panangdangran kenkuana ni Edmar Unite y Cortez, baro, a nagramut iti panagsubangda bayat a nabartek ti anak.

Sakbay ti insidente, naggiinom da Unite ken kakaduana kalpasan ti panagtrabahoda iti kataltalonan ngem idi naggawiden dagiti kinainomna, nagsubang dagiti agama a nagtungpal iti panangdangran ti suspek iti amana babaen ti patadem.

Iti butengna, naglemmeng ti biktima ngem nasapulan ti suspek ket minalona ti amana babaen ti natirad nga steel bar a nakadunoran ti ulo ti biktima.

Intaray dagiti nagresponde a polis ti lakay iti Metro Vigan Cooperative Hospital idinto a naglibas ti suspek kalpasan ti insidente.#