BANTAY, Ilocos Sur – Gapu iti aso, binato ti anak ti amana iti plato a puon ti nakadunoran ti agong daytoy ken puon ti nakayospitalanna idi rabii ti Pebrero 26.
Iti panagimbestiga dagiti polis, idi agarup 8:40 ti rabii ti nadakamat a petsa, nangisangpet ni Pablo Peria y de Peralta, 46, naasawaan, ken residente iti Barangay Cabalanggan, iti dua nga uken iti balayda.
Dinamag ni John Peria y Manalo, 21, baro, no nabayadanen ti asona a napilidan ken no ania kadagiti dua nga uken ti asona.
Insungbat ti ama a kukuana dagiti dua nga uken ken saan pay a nabayadan ti naatalan nga aso ni John.
Mapapati a nakarurod ti anak ket binatona ti amana iti plato a nakapuntaan ti agong ti lakay.
Inaresto dagiti nagresponde a polis ni John idinto a naipan ni Pablo sadiay Provincial Health Office, Vigan City.#