BANTAY, Ilocos Sur – Ania man nga aglablabes unay, dakes ti pagtungpalanna. Dakkel a leksion daytoy iti maysa nga ama a gapu iti sobra nga inomna, daytoy metten ti puon ti nakaatakeanna.
Nasukalan laengen ni Jonathan Madriaga y Blue, 29, naasawaan, gasoline boy, ti amana a ni Jose Madriaga y Padre, 56, balo, ken residente iti Barangay An-annam ditoy nga ili nga awanen ti biagna iti tugawna idi aganay 8:30 ti bigat ti Septiembre 28.
Iti panagimbestiga ti polis, rinugian da Jose ti naginom iti balay ti kaarruba nangrugi idi Septiembre 26 a mapapati nga awan a pulos ti impaunegna a taraon.
Idi malem ti Septiembre 27, gapu ta saanen a makaawid ti amana gapu iti bartekna, inyawid ni Jonathan sana pinanawan iti kuarto daytoy.
Ngem kabigatanna, natayen ti amana idi mapanna kitaen daytoy.
Mapapati a naatake ti balo agsipud ta binallaagan ti doktorna a saanen nga uminom gapu ta agsagsagaba iti nangato a pression ti dara.#
Â