Ama a pimmaltog iti anakna, nakasuan iti parricide

STA. CATALINA, Ilocos Sur – Napilaan iti kaso a parisidio ti maysa nga ama gapu iti panangpaltogna iti anakna idi karabian ti Paskua.

Pimmusay ni Fidel Ragunjan y Reintegrado, 38, tricycle driver bayat ti pannakatamingna sadiay St. James Hospital, Vigan City, gapu iti panangpaltog kenkuana ti amana a ni Manuel Ragunjan y Racsa, 72, residente iti Barangay Subec, ditoy nga ili.

Maipalagip nga adda saan a nagkinnaawatan dagiti agama bayat ti panagginomda idi agarup 10:10 ti rabii ti Disiembre 25 ket pinaltogan ti ama ti anakna a nagsagrapan daytoy iti sugat iti tianna.

Narekobre dagiti polis ti maysa a cal. 38 (paltik) a mapapati nga inaramat ti suspek a pinangpaltog iti anakna.#