Amnestia ti buis, naibasura

SINAIT, Ilocos Sur – Saan a limsot kadagiti konsehal ditoy nga ili ti singasing a maikkan iti amnestia ti penalty dagiti residente a delingkuente nga agbaybayad iti real property tax.

Naisingasing ti tax amnesty  tapno makasingir ti munisipio kadagiti residente a saan a nakabaybayad iti miliarda.

Ngem iti biang ti OIC a tesorera, saan a pabor a maited ti amnestia agsipud ta unfair kadagiti residente a napasnek nga agbaybayad iti miliarda.

Amken met dagiti dadduma a konsehal a no maipakat ti amnestia  kadagiti di nagbaybayad iti miliar, mairuamda ket yuraydanto manen ti pannakaited iti sabali manen nga amnestia.

Naammuan nga idi pinagbubutosan dagiti konsehal ti nasao a singasing bayat ti maysa a sessionda, innem ti kimmontra idinto a dua laeng ti pimmabor.#