Anak, pinakawanna amana a nangtagbat kenkuana

SINAIT, Ilocos Sur – Ama la ti ama, uray nadagsen ti nagbasolanna iti anak. Dayta ti rimbaw iti rikna ni Jeffrey Unciano y Querubin iti baet a nakaaramid ti amana iti dakes a dandani nakaisagmakan ti biagna.

Naammuan manipud iti polis ditoy a saanen a dumanon pay iti korte ti kaso mainaig iti pannakatagbat ni Jeffrey Unciano y Querubin, 28, baro, a ti mismo nga amana a ni Amador Unciano y Ibatuan, 54, naasawaan, mannalon, ti akin-aramid agsipud ta nagturay ti panagraem ti biktima iti amana.

Kinuna ti polis a saanen nga interesado ni Jeffrey ken ni Amador, agpada nga agnaed iti Barangay Pug-os, ditoy nga ili mainaig iti panangtagbat ti laklakay nga Unciano iti anakna idi rabii ti Septiembre 30, 2014 a puon ti nakaiyospitalan ti biktima.

Naammuan iti rekord ti polis nga iti dayta a rabii, aggiinom da Jeffrey ken ti kayongna a ni Honorio Baligad y Cadiente iti balayda idi simmangpet ni Amador a mapapati a nakainom met.

Mapapati nga adda saan a nagkinnaawatan dagiti agama ket bayat ti panagbinnarada, nangala ti suspek iti bolo ket tinagbatna ti biktima a nagsagrapan daytoy iti sugat iti ulo, iti likud ken nadumaduma a paset ti bagina.

Naitaray ti biktima iti Sinait District Hospital para iti pannakaagasna idinto a naipan ti suspek iti police station agraman iti bolo a pinangtagbatna iti anakna.

Ibilangen ti polis ditoy a saradon ti kaso iti panagkinnaawatan dagiti agama.#