VIGAN CITY – Naireport a napaltogan ti maysa a laborer ket ti mismo nga amana ti nangpaltog kenkuana.
Nainaganan ti napaltogan a ni Cresencio Tacadena y Recaido, 46, naasawaan, idinto a nabigbig ti pimmaltog kenkuana a ti amana a ni Jaime Tacadena y Tagupa, 75, agpada a residente iti Barangay Ayusan Norte, Vigan City.
Iti panagimbestiga dagiti polis, madama nga aggiinom da Cresencio ken kaduana a nainaganan Gilbert Ben y Culis, 34, naasawaan, laborer, ken residente met iti nadakamat a barangay idi kellaat a nagparang ti suspek sana pinaltogan ti biktima a nagsagrapan daytoy iti sugat iti makannawan a sakana.
Naitaray ti biktima iti Gabriela Silang General Hospital, Vigan City idinto nga inaresto dagiti polis ti suspek.
Saan a nailanad iti blotter no apay a pinaltogan ti ama ti anakna.#