Anak ti biktima iti pammapatay, nagandat ti biagna

NARVACAN, Ilocos Sur – Nakurang a dua a lawas kalpasan ti pannakapapatay ti dakkelna a lalaki, ginandat a gudasen dagiti armado a lallaki a nagkalubbon iti motorsiklo ti anak daytoy idi malem ti Abril 13.

Pinaltogan dagiti armado a lallaki a riding in tandem ni Reynaldo Cambe y Carasi, 53, baro, mannalon, ken residente iti Barangay Tangadan, San Quentin, Abra idi agarup 3:50 ti malem ti nadakamat a petsa ngem saanda a napuruan ket nagsagrap daytoy iti sugat iti makannigid nga abagana.

Immuna a naitaray ni Cambe iti Central Ilocos Sur District Hospital, Narvacan gapu iti sinagrapna a sugat iti makannigid nga abagana sa naiyalis iti Judge Judge Celestino Guerrero Memorial Hospital, Sta. Maria. Madama nga agpapaimbag ita iti Candon City Hospital.

Kitkitaen dagiti polis ti anggulo nga adda pannakainaig ti pannakagandat ti biag ni Cambe iti pannakapapatay ti amana a ni Pepito Cambe itay Abril 2 a nakamassayag pay la iti balayda iti pannakaisurat daytoy.

Ngem iti pannakikoordinar dagiti polis-Narvacan iti hepe ti polis iti San Quentin Police Station, San Quentin, Abra, naammuan a nakasuan ni Reynaldo iti frustrated murder iti RTC Branch 1, Bangued, Abra idi Enero 20, 2011 iti babaen ti Criminal Case No. 2011-006 mainaig iti pannakapaltog ni Dominador “Jong-jong” Cardenas.

Mapapati a naglemmeng ni Reynaldo manipud idi agingga iti naareglo ti kasona babaen ti panagbayadna iti P300,000.00.

Segun iti inisial a panagimbestiga dagiti polis, agdaldaliasat iti national highway a sakup ti Barangay Lungog, Narvacan ti Racal motorcycle a minaneho ni Cambe, kasakayna ni Jenelyn Villarin y Cabuco, 31, kalib-in ti biktima, idi pinaltogan ida dagiti di nabigbig a suspek a riding in tandem.

Kinuna met ni Villarin nga aggawiddan iti Abra iti dayta a malem, ket iti nadakamat a barangay, inabay ida dagiti suspek a naglugan iti di ammo a motorsiklo ket pinaltogan ti maysa ti biktima a nakatamaan iti likud ti makannigid nga abagana.

Naglibas dagiti suspek iti saan nga ammo a direksion. .

Ngem iti panagpalutpot dagiti polis-Narvacan, imbaga ti biktima ken ti kalib-inna a dida nailasin dagiti nagisayangkat iti pammaltog kasta met iti inaramatda a motorsiklo.

Agtultuloy ti panagimbestiga dagiti polis no adda pakainaigan ti pannakapapatay ni Pepito Cambe ken pannakapaltog ni Reynaldo Cambe iti naareglo a kaso daytoy iti napalabas.#