Footer

Anak ti Cordillera People’s Democratic Front spokesman naaresto iti maysa a mall iti Baguio

BAGUIO CITY – Kinumpirma ti Cordillera police director a sumangsango ti anak ti spokesman ti Cordillera People’s Democratic Front (CPDF) nga inkustodia dagiti police ken military intelligence agents iti kaso a frustrated murder ken murder kadagiti korte iti Mt. Province.

Kinumpirma ni Chief Superintendent Benjamin Magalong, Cordillera police director, nga inaresto dagiti intelligence agents ni Grayson Naogsan, anak ni CPDF spokesman Simon Naogsan, idi agarup 3:30 ti malem ti Nobiembre 5 bayat ti panagkapeda ken maysa a kaduana iti SM ditoy siudad.

Ngem iti waragawag manipud iti Cordillera Human Rights Alliance ken ti Karapatan, mapapati a nakaaruat iti sibilian dagiti nangaresto ken ni Naogsan a nagpabigbig a polisda bayat ti panagkape daytoy ken maysa a kaduana iti SM Baguio idi agarup 3:00 ti malem ti nadakamat a petsa.

Mapapati a political officer ti Abra Provincial Party Committee of the Communist Party of the Philippines-Ilocos Cordillera Regional Committee ni Naogsan.

Segun iti CHRA, nangiparang dagiti polis ken ni Naogsan ken ti kaduana iti warrant of arrest ngem mapapati a nalimed a nakadugsol dagiti paltogda iti bakrangda, pinonasanda ni Naogsan sada imbaga iti kaduana nga alaenda daytoy iti Camp Crame.

Mapapati nga impagna dagiti tallo a polis ni Naogsan iti likud nga agdan ti mall a naparabawan ti posasna babaen ti maysa a diaket.

Iti agarup 5:00 ti malem, timmawag ti asawa ni Naogsan ket insungbat daytoy nga addadan iti ruar ti Baguio ket maipan iti Camp Crame. Daytan ti naudi a nakapatang ti asawa ni Naogsan kenkuana.

Nagpatulong ti asawa ni Naogsan iti CHRA ken iti Karapatan National Office ket binirokda daytoy kadagiti nadumaduma a military ken police camps iti Metro Manila.

Nagturong pay ti asawa ni Naogsan ken ti Karapatan iti Criminal Investigation and Detection Group (CIDG) ken iti Complaints Referral Action Center (CRAC) office iti Camp Crame idi Nobiembre 5 ken 6 ngem mapapati nga imbaga dagitoy dua nga opisina nga awan ti pannakaammoda iti pannakaisayangkat dagiti operasion iti pannakaaresto ni Naogsan, kasta met nga awan daytoy iti kustodiada.

Kanaig daytoy, kinuna ni Jude Baggo, secretary general ti CHRA, a sakbay ti pannakaaresto ni Naogsan, dua a lalaki a nagpabigbig a CIDG personnel ti nagdamdamag maipapan ken ni Naogsan ken imparipiripda nga adda gunggona a P500,000.00 iti makaited iti aniaman nga impormasion.

Kinuna ni Baggo nga iti ibabayag ti pannakadetene (ni Naogsan), kumarkaro ti pannakalabsing dagiti kalinteganna sana innayon a “demandada ti pannakairuar ni Naogsan tapno maikkan ti pamiliana ken ti abogadona iti access iti nakaipananna.”

Ngem kinuna ni Magalong a sumangsango ni Naogsan iti kaso a frustrated murder ken dua a kaso ti murder iti Bontoc a kabesera ti Mt. Province.#