Anak ti konsehal, natakaw ti motorsiklona

VIGAN CITY – Intaray dagiti mannibrong ti motorsiklo ti anak ti maysa a konsehal ditoy siudad idi sardam ti Oktubre 25.

Kinuyog ni Konsehal Henry Formoso ti anakna a ni Arjay Formoso y Supnet, 21, baro, residente iti Barangay I ditoy siudad, a nagreport iti polis a tinakaw dagiti di nabigbig a lallaki ti motorsiklo ti baro.

Segun iti panagpalutpot dagiti polis, napan simrek ti biktima iti Kimos Internet Cafe a masarakan iti Barangay Tamag idi agarup 2:30 ti malem ket idi aggawiden iti agarup 7:00 ti rabii, nadiskubrena laengen nga awan ti motorsiklona iti nangiparkinganna.

Segun iti maysa a saksi, nakitana a sinakayan ti dua a lallaki ti nasao a motorsiklo iti agarup 3:00-4:00 pm.#