Anak ti mayor, naiyendorso mangsukat bakante a puesto ti konsehal iti Vigan City

VIGAN CITY – Dua a grupo ti nangiyendorso iti anak ti mayor ditoy siudad a mangsukat iti nabakante a puesto ti konsehal iti sangguniang panlungsod ti Vigan.

Sangsangkamaysa nga inyendorso ti sangguniang panlungsod babaen ti resolusion a pinutar ni Konsehal Loreto Quibilan ken ni Gov. Luis “Chavit” Singson a ni Janina Carine S. Medina ti sumukat iti puesto ti konsehal a nagbakante idi naital-o ni Konsehal Lourdes Baquiran a bise mayor gapu iti pannakapili ni Vice Mayor Ryan Luis Singson a diputado iti umuna a distrito ti Ilocos Sur iti special elections a naangay idi Mayo 28.

Inyendorso met ti Association of Barangay Captains iti panangidaulo ni ABC Federated President John Patrick Singson babaen ti maysa a resolusion a ni Medina ti sumukat iti nagbakante a puesto ti konsehal iti sangguniang panlungsod.

Kanaig daytoy, kinuna ni Mayor Eva Marie S. Medina a maragsakan ken “very proud” iti panangpili ti ABC ken ni Janina a sumukat iti nagbakante a puesto ti konsehal maigapu iti pannakabutos ni dati a Vice Mayor Singson a diputado ken iti pannakaital-o ni Baquiran a kas bise mayor.

“Asino koma ti ina a saan a maragsakan no ti anakna ket mapili…” kinuna ni Medina bayat ti interbiona ken ni Peter Rebunal a naipatangatang iti    programa iti DWRS ni Jun Ramos, anchorman iti Barangay Commando Brigada.

Innayon ni Medina a maysa laeng nga apprehensionna no kasano ti reaksion ti anakna no adda man maibato kenkuana a pammabalaw mainaig iti panagserbina a kas konsehal agsipud ta sensitibo ti anakna.

“Saan a bale kaniak ta uray aniaman a pammilaw nga ibatoda kaniak, okay laeng ket nakasaganaak,” kinuna ti mayora.

Nupay kasta, kinuna ni Medina nga awan ti makitana a problema no pilien ti partido ti anakna agsipud ta uray idi ubing pay ket managbasa ken napinget nga agsursuro.

Iti special elections a naangay iti umuna a distrito ti Ilocos Sur, imbalat ni Singson ti kinasangona a ni Atty. Trandy Baterina para iti kinadiputado.

Nagbakante ti puesto ti diputado iti umuna a distrito kalpasan nga inikkat ti Kamara ti nagan ni dati a Cong. Ronald Singson iti listaanna agsipud iti pannakasentensiana iti Hong Kong court a mabalud iti maysa ket kagudua a tawen gapu iti panagikutna iti droga.

Kabayatanna, iti interbiona iti media, kinuna ni Medina nga “overwhelmed” iti panagtalek nga inted kenkuana ti ABC ken ti sangguniang panglunsod ket inkarina a no patalgedan ni Gov. Singson ti panangiyendorso dagiti dua a grupo kenkuana, ipaayna ti amin a kabaelanna nga agserbi para kadagiti kailianna iti Vigan City.#