: Anak ti napapatay a hues: Innala daytoy a rehimen ti tatangko | Tawid News Magazine - Weekly Ilocos News 📰

Anak ti napapatay a hues: Innala daytoy a rehimen ti tatangko

BAGUIO CITY — Impeksa ti anak ti napapatay a Regional Trial Court Judge Mario Anacleto Bañez iti Facebook ti panniriganna maipapan iti pannakatay ti amana bayat iti umad-adu a grupo a mangipabpablaak ti panangkondenarda iti pasamak.

“I will not mince words. In the pursuit of justice, my father was murdered. Assassinated. Evil men took away life from someone who deserved to live for as long as he could,” kuna ni Darryl Lance, iti postna maysa aldaw kalpasan ti pasamak.

Imbingayna ti nakaro a panagladingit ti pamilia ken gagayemda gapu iti pasamak. Kunana a numanpay ammoda ti peggad ti trabaho ti amana, napalalo latta ti sakit a marikriknada gapu iti pannakapapatay daytoy.

Kuna ni Darryl a ti pannakapapatay ti amana ket “larger than our own suffering.” Impalagipna a ni Judge Bañez ti maika-6 a hues ken maika-43 nga abogado a napapatay “under this regime that sows terror to those who believe in justice.”

“I grieve not only because he was my father with whom I grew up admiring his integrity, but also because I feel that the State, this regime, took my father from me,” kinuna.

Maipalagip a tinambangan dagiti saan pay nabigbig a suspek ti hues bayat nga agmanmaneho daytoy agturong iti balayda idi Nobiembre 5 iti malem. Napasamak ti pammaltog idiay Brgy. Mameltac, San Fernando City, La Union. Intaray dagiti immarayat ni Judge Bañez idiay Bethany Hospital no sadino ket naideklara isuna a dead-on-arrival.

READ: RTC judge killed in La Union ambush

Panangkodenar iti pasamak

Kinondenar ti nadumaduma a grupo ti pannakapapatay ni Bañez.

“We are shocked. We are outraged beyond words. We condemn this senseless act. We call on the authorities to be swift and thorough in their investigation in order to apprehend the perpetrators,” kuna ti pablaak ti Integrated Bar of the Philippines La Union iti Facebook.

Kabayatanna, kuna ti HUKOM, Inc. a ti pannakapapatay iti judge ket “fostered by the climate of violence and impunity.”

“While we continue to condemn these killings, the more important task now is for all stakeholders of the justice sector… to push for meaningful reforms in all institutions involved in the delivery of justice to everyone,” kuna ti grupo iti pablaakda.

Kiniddaw met ti rehional nga opisina ti Commission on Human Rights iti Ilocos kadagiti maseknan nga ahensia ti pannakaisayangkat ti nauneg nga inbestigasion. Kasta met a nagapelada kadagiti nakasaksi iti pasamak a makitinnulong para iti napaspas a pannakarisut ti krimen.

Impakita met ti ili ti Tagudin nga ayan iti RTC Branch 25 nga idadauloan ni Bañez ti panagladingitda ken panangkondenar ti pasamak babaen iti panangipublikar ti kiddaw a hustisia iti community billboard ti munisipio. Kasta met a binalkotda ti aglawlaw ti justice hall ken munisipio iti nangisit a lupot.

Nangisayangkat met ti misa iti ili kas pammadayaw iti napapatay a judge nga indauloan ni Mayor Roque Verzosa, Jr. iti auditorium ti munisipio idi Huebes. Naibiahe ti bangkay ti judge iti balayda idiay San Fenando City iti simmaruno nga aldaw.

Ballaag iti hudikatura

Patien ti grupo a Karapatan a ti pannakapapatay ni Bañez ket maysa a ballaag kadagiti hues a mangdisdismiss kadagiti maipilpila a kaso kadagiti ak-akusaran ti militar a kameng ti New People’s Army (NPA).

“The cold-blooded murder of Judge Bañez comes after (the military) urged the Supreme Court to investigate judges who dismissed cases filed by state forces against activists,” kuna ni Roneo Clamor, Deputy Secretary-General ti Karapatan.

Iti daytoy napalabas a Setiembre, inyetnag ni Bañez ti desision iti inpila a kaso ti 81st Infantry Battalion kenni Rachel Mariano, maysa a community health worker ken aktibista a taga-Baguio.

Kuna iti korte a saan daytoy a “morally convinced” iti pammabasol kenni Mariano gapu ta saan nga umanay ti ebidensia kontra kenkuana tapno mangitinnag ti korte iti guilty verdict.

“Her being an activist may have subjected her to suspicions of involvement in some subversive activities. But it has been a long-standing principle that suspicions, however strong, cannot equate with the quantum of proof required by law to support a conviction,” kuna ti desision.

Inakusaran dagiti kameng ti army ni Mariano a nakipaset kano iti napasamak a panangtambang dagiti NPA idi Oktobre 2017 idiay Brgy. Patiacan, Quirino, Ilocos Sur a nakatayan ti maysa a soldado ken pannakasugat ti maysa pay.

Nangbukelen ti Police Regional Office 1 iti task force a mangimbestiga iti krimen. Madama a kitkitaen dagiti pulis ti posibilidad nga adda kainaigan iti trabaho ti hues ti pasamak. Kinuna dagiti otoridad a nakaaladan iti video manipud kadagiti CCTV iti lugar a nakapasamakan ti pammaltog. ●