Anaraar ti agsapa (Maikadua a paset)

KINASARITAK ni Matet, impudnok ti parikutko, no ania iti kasayaatan nga aramidek. Umararaw iti tulong ken pannarabay. Nasken a maiwanwanak iti maiparbeng nga aramidek. Addaak iti situasion nga agngangabit ti pannakapukaw ti napateg unay kaniak.

“Nadlawko dayta ken adda metten sumagmamano a nangikissiim; ngem ammok, a dumtengto nga umasidegka kaniak. Ket itan, dayta a kanito,” pinerrengnak, “binallaaganka idin, ngem dimo inkaskasao. Sika ngarud iti nagbiddut! Sika nagtignay iti inuubing nga aramid.”

“Matet, ania ti kasayaatan nga aramidek? Tulongannak, pangaasim…!”

“Kasaom, agpakumbabaka, aminem ti nagbiddutam. No nasken nga agpakpakaasika a makisarita, aramidem dayta. Iti daytoy a situasionyo, awanen espasio ti nangato nga ulo.”

“No dinak met kayat a kasao…” Insennaayko.

“Well, life’s goes on! Awan iti sabali nga aramidem no di panangsursurom nga awaten ti amin no dinaka kayat a kasao, nga awanen ti sigud a ngayed ti napalabas. Adda met panawen, a nasken nga irikep ti libro, ta nalpasen ti pakasaritaan wenno saan, maituloyto! Ngem sakbay a mapasamak dayta, agtignayka, aramidem amin a pamuspusan tapno makapagsaokayo.”

Diak nalapdan ‘toy bagik, ket nagsaibbekakon. Diak maawat a kastoy iti nagbanagan ti kinaawan iti importansia iti banag a rumbeng koma nga ilalaen. Kayatko nga aturen ti biddutko.

“Personal unay ti situasionyo, ket ti third party wenno ibaballaet ti asinoman ket bassit laeng ti tiansa a magemgemanna nga awiden tunggal pangngeddeng. Nupay kasta, kasaok ni Roland, ngem dimo namnamaen ti pannakaalukoyna ta personal a pangngeddengna daytan, addaan iti bukod a panunot; kangrunaanna, adda uteken ti Roland; in short, well-founded no mangeddeng. No pinal ti imbaganan, isu dayta ti masurot. Maawatam koma.”

“N-no koma namatiak kenka idi…”

“Dimo pabasolen dayta bagim, maikarangukongka laeng iti pannakaipusing, panagmaymaysa a mangbukbukod ti sainnek. Awan sabali nga aramidem, no di ikagumaam a sangoen no ania ti dimteng a parikut; no nagballigikaman wenno saan, nasken nga awatem, ta dagiti frustrations ken failures ket agserbida a kas pagrukodan iti kinatibker ti nakem wenno kinatao para iti sumaruno nga aldaw, tapno maliklikan ti kapadana wenno nakarkaro pay a sagabaen.” Nakipinnerreng a kasna tuktukoden ti mugingko.

Inaramidko ti balakad ni Matet, ngem nainget unay iti panangadayo ni Roland kaniak; iti ummong, no umasidegakon, pumanaw metten. Likliklikannak, a kasla ketdin addaanak iti makaalis a sakit. Nasakit nga awaten, narigat nga akseptaren. Ngem siak, wen, siak ti nagbasol.

Maysa pay a nangnayon iti padagsen a marikriknak ket iti diak pannakatawag kenkuana babaen iti selpon; kasta met iti teks, a nalabit nga im-block-na ti namberko wenno nagsukat iti sim. Uray iti account-na kadagiti nadumduma a social media platforms ket diak mapaluboasan nga ag-send iti mensahe.

Kastoy kadi ti kagrabe iti naaramidak a basol kenkuana? Agbabawiakon, ngem dina maawat ti panagbabawik isu dinak kayat sa kasao?

Kuna ni Matet: “Sorrry, friend, dina kayat iti makisao kenka. Nagsaokamin. Nagpakpakaasiak pay a kasaonaka ngem, solido ti pangngeddengna Diak met mapilit, ta kabukbukodanna a pangngeddeng dayta. Ti dakdakkel a tiansa ti pannakaisubli ti komunikasionyo ket sika a mismo iti mangidalan.”

“Mariribukanak… diak ammo ti aramidek…”

“Saan a dayta ti panunotem, saan a ti kinaawan iti maaramidam no di ket no ania ti sumaruno nga addangmo tapno maawidmo manen ti immatangna. Think positive! Dika unay agsensenti ta di makatulong dayta, no di ket mas lalo nga idagemnaka!”

Nagdumogak, ta mangrugi manen nga agarimasa dagiti paningkitek. Iti tayagko a lima kadapan ken lima a pulgada, nataytayag la iti dua a pulgada ni Roland. Laeng ta, mas nabannayad ti pannagna ngem siak a padalusdalus ken di mangipirpirit ti kinaada ti todo bale nga addang.

“Iti panagpanunot iti positibo ket pudno la unay a dakkel a banag a mangiwalin ti nangisit nga ulep a nangabbong ti muging. Isu dayta ti pagkaptam, friend, tapno dika maidagem. Ania ti ammom, no dumtengto met laeng ti gundaway nga ikkannaka iti sabali pay a tiansa a mangsulnit ti nagkurkurangam? Well, saantay’ a maibaga dayta, a mapasamak ngem ania ti ammom? Iti kastoy a situasion, nasaysayaat a panunotem dagiti positibo a banag. Dagiti negatibo ket lalo laeng nga idagemnaka. Cheers, friend!” Ket pinanawannakon ni Matet nga agmaymaysa iti bench iti sirok ti nalayog a narra iti school campus, ta itay pay laeng a paypayapayan dagiti kakaduana nga staff iti Sparks and Glitters iti pasilio ti main building.

Nautobko ti kinapudno dagiti palawag ti gayyemko, nasken a rumuk-atak iti kinasenti wenno iti sentimental nga agpang, ket iduron ti kinapositibo. Nasken ngarud a tingitingen no aniaman ti mapanunot nga addang.

Okey, no dayta ti umno nga aramiden, isu ngarud ti maitutop.

Nupay diak a nairuam a bumangon a nasapa iti aldaw ti Domingo, nasken nga aramidek, ta diak pay ket malagipen no kaano a simrekak iti uneg ti simbaan. Nalipatak wenno simmadutak ti akemko a kas Kristiano, idinto ta agduagasut a metros laeng ngata ti kaadayo ti simbaan iti balaymi. Nasken nga umararawak met iti pannakasolbar koma ti pakarikutak. Diak ammo, ngem hustonsa ti kunkunada, a santola malagip ti tao ti Mannakabalin no awanen iti mabalinna nga aramiden iti naikaipasungalngalanna a parikut.

Aminek maysaak ditan, a sako la malagip ti Namarsua itan ta adda nadagsen a parikut a sangsanguek. Kas kuna ti gayyemko, ni Matet, saan laeng koma nga iti panawen a kinaadda iti parikut a malagip ti Namarsua no di ket agnanayon koma, nga isu ti sentro ti biag.

Iti dayta a Domingo, a kagapgapuk a nakimisa, ken mangbaybaybay iti 3rd Street, kaslaak magmagna nga adda padagsen dagiti sakak. Nupay kasta, simmeksek ketdi iti mugingko, nga iti pananglabasko ti balayda Roland, agkitakam koma wenno makitak koma ket maaddaanak iti tured pakinakem a makisarita kenkuana, nga agpakpakaasi a kasaonak koma tapno agpakawanak iti nagbiddutak. Daytoy ti naitanamitimko a mapasamak. Tinangadko ti asul a kalangitan.

Dandanikon mabatogan ti balayda Roland, nakurang a sangapulo a metro laengen. Pagammuan, nasaripatkpatak iti iruruar ni Roland iti ruanganda, nakadumog nga agpinpindot iti selponna kabayatan iti pannagnana nga agdardaras.

Minirak ti masanguanan, awan iti matatao, kasta met iti likudan nga agturong iti kangrunaan a kalsada. Daytoyen ti umno a gundaway!

Ngem kasano ken ania ti aramidek?

Agindudumogak. Dungparek wenno igagarak a dungparen. Ditanton nga umiggemak kenkuana wenno umarakop ketdin a, total awan met iti makaimatang. Ken maysa, iti 3rd Street, adu ti makaammo ti nainkaubingan a relasionmi; kumbaga, childhood sweetheart, isu a natural laengen a buya iti makaimatang. Okey ngarud, dayta ti aramidek.

Nakadumogak ken nagin-inayadak ngarud a nagna, ngem saan a maikkat iti mugingko iti aramidek. Ngem nagbalawak iti mangliwengliweng a kinaubbaw. Daydiayman magmagnaka nga agmaymaysa iti mangliwengliweng nga atiddog a kalsada iti maysa a tengnga ti aldaw, a kasla dimon kayat a patuloyen ti pannagnam ta awan iti makalinong kenka ngem nasken met nga aramidem ta awanen a sabali pay iti pagpiliam nga aramiden no di dayta laeng a banag.

Timmalliawak iti masanguanan, awan ni Roland! Napasarimadengak. Tinaliawko ti likudak. Adda ni Roland ngem iti bangir nga abaga ti kalasada! Napartak ti pannagna nga umad-adayo. Isu met laeng a dikam nagsabat ta bimmallasiw idi nakitana nga agsabatkami a dua!

Nariknak a dimmagsen ti barukongko iti pannakapaay. Nagubbog dagiti matak iti saan a pannakaited ti tiansa a makapagsaokami a dua!

(ADDA TULOYNA)