Ania, arapaapmo ti agpadi? (Last Part)

Daytoy ti nagdumaan ti padi a katoliko ken dagiti dadduma a padi, pastor, pastora, ministro ken dadduma pay a relihion. Iti katoliko, saan nga agsueldo ti padi. No agretiro, agsubli iti pamiliana, no adda. No saan, adda nairanta a pagnaedanda.

Ngem kabayatan ti kinapadim ken nakaaramidka, (inggagara man wenno nalipit wenno nakalipat) iti maikaniwas iti bokasionmo, sika ngarud daytay maawagan iti itta iti sangakaban a bagas. Nasaysayaat ngarud no sika ti maimurian. Iti ababa a pannao, sika met laeng ti nangdadael iti bukodmo a bagi. Adda pay laeng panawenmo a manguksob iti abitom babaen ti inka panagsubli a kas gagangay nga umili. Ta no saan a maipataw met laeng kenka ti suspension no mapaneknekan ti inka panaglabsing kadagiti annuroten ken kaipapanan ti maysa a padi.

“Mabalin met gayam nga aggobernador ken board member ti padi, papang!” kuna manen ni buridek. Kalkalpas ti eleksion. Iggemna ti pagiwarnak a nalabit binasana. Ta no awan ti maaramidanna, no nauma iti sango ti telebision, dagiti met pagiwarnak ken magasin ti atupagenna, no saanna nga il-illekan dagiti libro ni Bob Ong.

Kinudkodko ti di met nagatel a tuktokko. Nalabit a ni Father Ed Panlilio, ti governor-elect iti Pampanga ken board member-elect Father Nardo Cayat ti Benguet ti kayatna a sawen. (Ni Fr. Nardo, ket suspendido iti akemna a kinapadi gapu iti alegasion a reyp kontra kenkuana ken iti panaglabsingna kadagiti pagannurotan iti kinapadi. Nagtaray a mayor idi 2004 ket nangabak. Ngem sinuspinde ti DILG. Timmaray manen itay napalabas nga eleksion ket nangabak manen.)

“Mabalin ngem mangala iti leave of absence. Kayatmo latta ti agpadi?”

“Wen a!”

“Kayatmo ti agbalin a governor wenno board member no padikanton?”

Nagkatawa. “Astig, di ba?”

“Lukdit! Dika koma pay nangabak iti supreme council no dimo tinerorays dagiti kinder, grade one, grade two ken grade three, kuna ni titsermo!”

“Saan met a!”

Idi grade five, timmapog ti anakko iti politika iti eskuelaanda ket naabak. Ngem nangabaken idi grade six.

Arapaap. Daytoy ti kakaisuna a libre nga aramiden ti tunggal maysa. Napateg a banag ti arapaap ta isu dayta ti pagturongan ti biag. Goal, kunada man. Adda dana. Adda met papanan. Ngem saan a magun-od amin nga arapaap. Iti dana ti biag, adda met  panagsikko no makakita iti mas naim-imbag ngem iti kinayat, wenno saan, naiyaw-awan iti inna pannakabitattew wenno nakakita iti mutia a nangiyaw-awan kenkuana.

Arapaap man ti panagpadi, 98% laeng ti posible a makapagpadi. Ta ti Dios ti nangawis iti kinapadi, a saan ket nga indeldel wenno impresentar ti bukod a bagi.

No nangngegmo dayta nga awis, good for you. Ngem adu dagiti naawis ngem manmano dagiti nagtungpal. Adu dagiti nagtungpal ngem manmano met dagiti napili. Kastoy ti kinarikut ti panagpadi…

Ti buridekko? A, wen, inyenrolko itay nabiit iti first year iti St. Louis of Pacdal nga imatonan ti mediaman a padi, ni Fr. Jay Alipio. Agabay ti simbaan ken ti eskuelaan, kas met idi siak ti kas kenkuana, iti Narvacan. Kas kenkuana, nagarapaapak met idi nga agpadi. Kas kenkuana, kamengak met iti supreme council ti eskuelaan.

Paulit-ulit wenno nagkaarngi a pakasaritaan dagiti agama. Awan ti makaibaga iti mapasamak iti masakbayan.#