Footer

Ania, arapaapmo ti agpadi? (Part 2)

ITI Katolisismo, dua a klase dagiti padi. Dagiti padi a mangimaton iti parokia ken dagiti padi a misionero a ti kombersion, panangipatakder kadagiti mission, (i.e. pagtaraknan kadagiti masakit, nataengan, biktima ti gubat ken oppression; kadagiti eskuelaan; kadagiti ospital; ken dadduma pay) dagiti kangrunaan nga akemda.

Sangapulo ket tallo a tawen ti panagadal iti kinapadi. Kadagiti nagraduar iti hayskul, agadalda pay nga umuna iti pilosopia sakbay a makastrekda iti major seminary. Uppat a tawen dayta.

Sakbay a makastrek iti minor seminary, adun a proseso: saludsod no apay a kayat; aglasat iti uppat a sagatan: maobserba ti panagsasao, tignay, ugali, aramid. Iti minor seminary, maobserba a nalaing ti agregget bayat ti panagadalna iti pilosopia. Obserbaranna met ti bukodna a bagi. Kalpasan ti uppat a tawen a panagpupok wenno panangipamaysa iti panagadal (tapno naim-imbag a denggen), madamag manen ti agregget no kayatna pay nga ituloy. Maibaga met kenkuana no saan a mabalin ta di naimbag iti inna panagsasao wenno dagiti agaon iti ngiwatna ken kapanunotanna, saan a naimbag ti tigtignayna, saan a naimbag ti ugalina, saan a naimbag ti aramidna. No di nakalasat iti uray maysa kadagiti uppat a sagatan, agpatingga laengen dita. Gudbay! At least, graduadon iti AB Philosophy.

No mabalbalin ken mabalin iti pannakalusotna iti sagatan, ala sabali manen a panagadal – iti major seminary. Maipangruna ti teolohia. Narikrikut manen a panagadal. Kasapulanen ditoy ti sipupuso a panagadal ken konsentrasion. Mapaliiw latta ti agregget babaen kadagiti uppat a sagatan. Kaunaan a kitaenda ti kinaragsak. Dagiti saan a naragsak, mabagbagaan. Ta kasano koma a makapagtrabaho ti tao a di naragsak iti aramidna? Saan laeng a kinaragsak no di pay dedikasion.

No makaturpos, di pay nalpas. Mapasamak pay ti makunkuna a regency wenno leave of absence a pangtingitingan a nalaing ti agpadi iti bagina. No limbut latta iti sagatan, nabara a kablaaw!

Ngem no adda nakita dagiti padi a mangisursuro a madi, gudbay arapaap! Total di met laeng nga iti panagpadi a makapagserbika iti Dios. Adu a wagas: babaen met laeng iti panagsasao (panagpampanunot), panagtigtignay, naimbag nga ugali (i.e. ama, umili, iti aniaman a propesion ken trabaho) ken aramid.

No naordinankan, yes! Inkayo ngarud kadagiti amin a tao iti amin a lugar, ket buniaganyo ida iti Nagan ti Ama, ti Anak, ken ti Espiritu Santo. Isuroyo ida kadagiti pannursuro ni Jesus…

Ngem laglagipen a saan a trabaho ti kinapadi. Ulitek manen, saan a trabaho ti kinapadi no di maysa a klase ti panagbiag.  Iti panagserbi laeng iti Dios dayta a panagbiag.

(Adda tuloyna)