Ania Daytoy Ar-aramiden Dagiti Idolo Dagiti Agtutubo?

Salaysay ni Rilo Bedo

Umuna a paset

 

Nasagraduan nga aramid—a para laeng koma kadagiti naasawaan. Mapasamak daytoy iti nagan ti ayat wenno pinnateg; ken iti pribado laeng a lugar. Ditoy a nanamen ti imnas ti rikna a dagiti laeng agpartner ti ad-adda a makarikna. Agtalinaed met a pribado daytoy a pasamak.

Paset ti biag ti agassawa ti panaginnayat. Sagut ti Namarsua kadagiti annakna. Kuna pay dagiti sutil, daytoyen ti kaiimasan a “luto” a masapul a ramanan, mapadasan ken ma-enjoy. Ketdi, adda limitasionna (koma). Para kadagiti agassawa, kas nasaon.

Ti dakesna, maab-abuso daytoy. Iti internet, agkaraiwara dagitoy nga eksena a ma-access a libre dagiti adda koneksionna ditoy a lubong. Makopia, maipasa, pagsisinnublatan a buyaen (iti netbuk, laptop, selpon ken dadduma pay a gadget). A kasla ketdin nagbalinen a normal a paset ti inaldaw-aldaw a panagbiag.

Rumabraba latta ngarud ti parikut iti pornograpia. Marigatan dagiti otoridad a mangpasardeng kadagitoy nga indibidual a pinagbalindan a negosio daytoy  nakadurdurmen nga aramid. Ta adu met latta ti mayat a maalaan iti pribado a buya.

Isu a dagiti nagannak, agbalinda koma a naridam kadagitoy a panagbalbaliw ti aglawlaw wenno atmospera dagiti ubbing. Dakkel ti maitedna a pagdaksan iti biagda no masubokanda, maisungsongda ti agbuya kadagitoy nga aramid.

Panagridam, dayta ti kasapulan dagiti nagannak. Dida gesdan ti mangtarabay, mangbagbaga kadagiti annakda. Di la mammamin-ano nga iti gayamen gadget dagiti ubbing, kangrunaan ti selpon, addan dagiti sex videos a mangsabsabidong kadagiti utekda.

Aglalo ta itay laeng kallabes, dua a celebrity ti nailamaw iti isyo ti sex scandal. Pagaammotayo la unay nga isuda a celebrities ti kaaduan a pagtamtamdan dagiti ubbing ken agtutubo itan. Ken pagsarmingan.

Itoy a panawen, nagdakkelan la unayen ti impluensia dagitoy nga artista iti biag dagiti annak. Ket rumbeng koma ngarud nga agbalinda a modelo iti aramid ken sarita. Saan a kasta nga agwaras pay dagiti pribado nga aramidda. Uray pay kunaenda a dida nagayatan ti panagwaras ti bideo, dakkel a responsibilidadda dayta.

Yanna pay a pagdaksan, am-ammo a pamiliado ‘ta maysa a celebrity. Ania laengen ti ibungana iti binangonna a pamilia? Ken iti panunot dagiti ubbing ken agtutubo?

Saan a siak dayta, mabalin nga irason dagiti adda iti bideo. Ta mabalin man met a baliwan ti rupa dagiti adda iti bideo. Ngem nalaka laeng a sawen dayta tapno maiyadayo iti isyo.

Kas nabasbasakon, asino, aya, ti mangaklon a kinautna ti itlog ti manok ti kaarrubada? Asino, aya, a politiko ti mangaklon a “nagbussot” dagiti bank account-da gapu iti pork barrel. Kanya-kanyang palusot, kas kuna dagiti Anggalog.

Isu a no maminsan, kasla kayatko a patien a ditayo pay naglupos kas maysa a bakes. Dinak musiigan (ta ammok a dika mamatpati iti Darwin Theory of Evolution). Kitaem man ketdi dita sarmingyo no palso ti ibagbagak. Ammokto lattan ti rason no apay a binettakmo ti sarming.

Saan met ketdin a baro kadatayo dagitoy a sex bideo. Iti sapasap a lubong, adu a nalatak a personalidad ti nag-leak dagiti pribado a lubongda iti ikub ti ipatpategda (asawa man wenno nangaswang kadakuada).

Iti panagsaruno manen daytoy nga isyo a nakatagamtaman ti nagan dagiti celebrity ditoy pagiliantayo, kasla nasuyatan iti napudot a danum dagiti adda iti ikub ti simbaan. Kinondenada dagitoy nga aramid. Ibabana kano ti moralidad ti puli ket dakkel a sabidong kadagiti ubbing nga agtamed la unay kadakuada.

(Adda tuloyna)