sinursuran-banner-sqSinursuranNi Jobert M. Pacnis

Ania, di nakatayab ni Mayyang?

Sinursuran: Kolum ni Jobert M. Pacnis
(Maudi a paset)

Ayna, barok, adda agatginelgel a baraniw dita, ania pay koma? Malagipko man dayta a pagsasao dagiti nataengan.

Kuna ti administrasion ti OTS ken ti eropuerto, adun kadagiti empleadoda (kangrunaan dagiti screener) ti nagipila iti leave-da ta saandan a makaya ti pannakabul-bully-da kabayatan ti panangakemda iti trabahoda. Awanen ti panagtalek dagiti pasahero kadakuada. Natadem kano payen ti panagkitkita ti tao kadakuada.

Kuna ti maysa nga screener: “Sa pagkatingin pa lang namin sa mga luggage nila na balot na balot ng plastic, nanliliit na kami sa sarili namin. Napakasakit…”

Gapu itoy, maysa a kaduada ti pimmusay iti atake ti puso gapu kano iti kapapanunotna iti kasasaadda. Saannan a nabaelan ti nagbaba a panagkita dagiti adda iti aglawlawda ta ti ammo lattan dagitoy, karamanda amin nga screeners iti nasao a modus. Ta no malaokan iti maysa a nalungsot ti sangatiklis a kamatis, ramaramen a dadaelen ti amin, kasla kasta ngaminen ti panunot ti kaaduan.

Itoy a panag-leave, panagpanaw dagitoy nga empleado, nakapusta ti seguridad ti pagilian. Isuda ti makuna nga umuna a depensa. No dida akmen ti maipakumit nga obrada, nalaka a mastrek ti pagilian dagiti adda nangisit a gagemna.

Gapu itoy, nabilin dagiti nadumaduma nga ahensia ti gobierno a mangkita itoy a parikut. Simrek ti National Bureau of Investigation, ken ti Senado ita a masursurat daytoy, tapno makita ti puon ken ramut ti amin. Ta no maysa a sindikato ti adda iti likudan dagitoy a pasamak, masapul a mapasardeng ket ikaroda dagiti nagbasolanda.

Ket iti hearing iti Senado, limtawen ti awan koordinasion ti airport management ken dagiti security officials.

Maysa daytoy a “failure” iti sistema, kuna ni Sen. Teofisto Guingona III. Namunganay daytoy idi kiddawen ti senador ti CCTV a mangipakita koma iti pannakaduktal ti bala iti bagahe ni Lane Michael White, maysa nga Amerikano a misionerio ditoy pagilian.

Kuna ni Manila International Airport Authority (MIAA) General Manager Jose Honrado nga adda iti opisina ni Undersecretary Roland Recomo ti OTS ti kopia ti CCTV.

Ngem awan kano iti ikub da Recomo ta dida a trabaho dayta. Nagangayanna, inaklon met laeng ni Honrado nga adda kadakuada ti orihinal a kopia ti CCTV. Ket impa-subpoena a dagus ni Sen. Guingona daytoy para iti sumaruno a hearing.

Iti met panagsaludsod ni Sen. Ferdinand “Bongbong” Marcos Jr. no apay a dina kinita ti kaso ni Gloria Ortinez, maysa nga OFW a biktima ti modus, kinuna ni Honrado nga awan kontrolna iti AVSeG ken OTS. Makikoordinasion ken pagsaritaan dagiti isyu a mapaspasamak, dayta kano laeng ti akemna kas general manager.

Di ammo dagiti opisialtayo ti makunkuna a command responsibility? Ania ngarud ita ti serserbina a kas manager ti MIAA no kasta?

Ket kabayatan a masursurat daytoy, maysa laengen a turista iti Hongkong ni Ortinez ta inikkat (terminate) a dagus ti amona idi di makasangpet iti naituding nga aldaw. Ti dakes, dina ammo a kasta isu nga intuloyna latta ti nagbiahe kalpasan a pinalugodan met laeng ti administrasion ti eropuerto.

Ngem daksanggasat, awanen ti sinangpetanna a trabaho iti Hongkong gapu iti dayta modus a nakabiktimaanna.

Gapu itoy, maysa nga addang ti napanunot ni Sen. Mirriam Defensor-Santiago. Kayatna nga amendaran ti RA 10591. Manipud iti prision mayor 6 a tawen ken maysa nga aldaw agingga iti 12 a tawen a pannakaibalud) a dusa ti asino man a pribado nga indibidual nga agimula iti ebidensia, maingato iti reclusion temporal (12 a tawen ken maysa nga aldaw agingga iti 20 a tawen). Ngem no maysa a public official ti nagbasol, 20 agingga iti 40 a tawen ti pannusana.

Iti iseserreken ti Senado iti kaso, mangnamnamatayo a mapasardengdan daytoy. Saan laeng koma a manmano ti makasuan iti administrabo. Amin a kameng ti sindikato.

Kadagiti dadduma a politiko, saan a dayta ngiaw a ngiaw, taul a taul ti obraenda. Ken agpappapogi gapu ta asideg manen ti eleksion. Addada dagiti mangikarkari iti legal assistance babaen kadagiti bukodda nga abogado. Adda payen legal help desk iti eropuerto a sidadaan a dagus nga agserbi kadagiti agkasapulan wenno biktima ti modus.

Panagkitak, saan a dayta ti solusion iti parikut. Panagkaykaysa a panangunton iti ramut tapno maparmeken daytoy. No asino dagiti maduktalan iti likudan daytoy nga isyu, maipataw koma ti agpapada a mayannatup a pannusa.

Sapay ta kasta, ‘nia? #