Ania, dimo kayat ti bumaknang, kompad?

Salaysay ni Jobert M. Pacnis

NAYNAY a mangmangngegak, Kompad, ken sigurado nga uray sika, nga agalen dagiti adu a kadaraantayo ti kinarigat ti panagbiag ita. Adda dita a yaradoda ti bagida tapno laeng makaalut-otda iti rigat. Ngem masdaawak kenka ta kunam ketdin a dimo kayat ti rumang-ay.

Apay a kasta, Kompad?

Wen, a, ta kaaduan a biktima ti kinadakes ket dagiti adda mabalinna, kunam, Kompad? Kayatmo a sawen, dagiti babaknang dagiti takawan, holdapen ken saeden dagiti managdakdakes kadagiti langlangalang?

Mabalin a hustoka dita. Ta ania met ngay ti takawenda kadagiti padata a buttaw ti bolsana?

Kunam pay a makaidagel ti kinabaknang.

Dika mapabasol kadayta a panirigam. Ta agpayso man met nga adu a kalugaranta ti nakadilpat laeng iti nam-ay, didan ammo a taliawen ti nagtaudanda. Ti makadakes, kagiddan ti panagpangatoda iti biag ti panagbaba ti moralidadda. Napukawen dagiti nabalitokan nga aw-awid iti pusoda ta pinandaganen ti kinabaknangda.

Pimmayso ti  sasawen ti Nasantuan a Surat kadakuada. Ti kuarta ti ramut ti amin a kinadakes.

No apay ketdi a kasta, a, ‘nia, Kompad? Awan koma met ti rumbeng nga ipagpannakkelda no nanam-aydan. Ketdi, aramatenda koma daytoy a gundaway tapno makatulongda kadagiti agkasapulan. Saan a tapno mangirurumen kadagiti babassit.

Ngem ti pakakatawaak a rasonmo, Kompad, ket ti pammatim a dagiti babassit, dagiti nakurapay, dagiti agrigrigat ditoy daga, isudanto ti maisalakan ‘ton maudi nga aldaw. A dagiti nakasagrap iti nam-ay ditoy daga, saandanton a maisalakan ta ninanamdan ti ragsak ditoy. Sabagay, adda pagsadsadagan dayta a pammatim. Mabasa dayta iti Biblia.

Ngem ammom kadi, Kompad, a depende met laeng dayta iti adda a wagas ti panagbiagtayo? Uray baknangka, no ammom ti mangiburay, dika mangirurumen, ay, ket saan met ngata a dinaka gunggonaan ti Langit. Ken uray met no marigrigatka, dina met kayat a sawen a maisalakankan no agbibiagka met iti sipnget.

Saluduanka gayam, Kompad, ta managbasaka iti Biblia. Ngem kas nakunakon, dinak makumbinsi kadayta a rasonmo no apay a dimo kayat ti bumaknang. Ta apay?

Napateg unay a maammuam, Kompad, a mismo a ni Apotayo a Jesus, maawatanna ti kinapateg ti kuarta iti biagtayo. Kinapudnona, 16 kadagiti 38 a pangngarigna ti maipuon iti kuarta. Ken ammom kadi pay a nangatngato iti sangapulo porsiento (10%) ti sinaona mainaig iti kuarta no idasig iti napagtipon a pannaritana iti langit ken impierno?

Inayonko metten, Kompad, a dagiti naindaklan a santo ken tattao ti Dios iti Biblia nagtaudda wenno addaanda iti nanam-ay a panagbiag. Pangarigan da Abraham (basaem ti kapitulo 13 ti libro a Genesis), Isaac nga anak ni Abraham, Job ken Nicodemus iti Baro a Tulag ken Joseph ti Arimathea (kitaem iti kapitulo 53 ti Isaiah).

Saan ngarud a dakes ti bumaknang/nabaknang, Kompad. Depende no kasano nga inusarmo daytoy iti biagmo. No la ket bunga ti napudno a panagtrabaho, saan nga iti kinukusit a wagas, ti ibabaknangmo, ken nadalus ti konsensiam, awan dakesna. Agrag-oka!

Ammom kadi no apay a bumakbaknang latta ni Baknang idinto a rumigrigat latta ni Marigrigat? Kinasalukag (Proberbio 10:4) ti ikut ni Baknang, Kompad. Ammona nga aramaten dagiti tallo a T (time, treasure ken talent) iti biagna. Dina sayangen ti tunggal orasna ta ammona nga adda agur-uray a gunggona dagiti ammona a tulongan ti bagina. Kas mabasa iti Proberbio 10:22:

“Ti bendision ti Dios ti mangpabaknang. Saanna a supapakan iti ladingit dagiti naimbag nga aramid.”

(Maigibusto)