Ania pagabrodem ni komadre? (Tuloyna)

Maikadua, maituredmo ngarud ita ti iliwmo ken ni Kumare no kas pangarigan ta umadayo? Agpada met laeng ket ti linaon ti bagista, Kompad. Sangkaarapaapta dagiti nasalemsem a parbangon. Saanmo a pagrason nga adu dita ti mangep-ep iti iliw. Dakkel a basol dayta. Dimo kunaen a tuladem dagiti konsehaltayo wenno ni madaydayaw a Tongressman wenno ni Apo Gobermanador.

Maikatlo, makasiguradoka kadi kadayta rekruteryo? No mamalaybalay laeng, Kompad, agpanunotkan. Aglalo no awan maipakitana nga ID wenno adres ti opisinada. Aglalo la unayen no agpayuna iti bayad a di met pay nakapkapan ni Kumare. Itay laeng Agosto 17 a panaggapuk iti kooperatiba ditoy ilitayo tapno pabaruek diay kontrata ti utangko, adda nakagiddanko a padak a miembro. Agpapaadbays piman no kasano diay utangda nga agassawa. Saanna kanon a mabayadan iti naituyang a panawen ta timmayaben ‘diay inutangna.

Kasano, Kompad? Inyutangna ‘diay pasbukna (saan a pesbuk, Kompad) tapno matulonganna diay kayongna nga agabrod. Ti makadakes, napeke piman diay kayongna. Ania pay ita? Nagpayaken ‘diay kuarenta mil nga inutangna! Nagsayaat ket koman, Kompad, no ni mayor wenno ni hepe dagiti mapeke tapno maparanudanna met dagiti rekruter iti ganganarenna iti hueteng.

Maikapat, no koma asikasuem daydiay nagkalaegan a bangkagyo? Mulaam kadagiti agbunga a kayo wenno natnateng. Uray man ketdi no kawkawwati laeng, nabalor met ket. Gupunggupongem nga ilako dagiti sangana kalpasan ti makatawen. No saan, ugingem. Ken maysa, napintas pay nga aramiden a ganagan dagiti bulongna. Pagrupsaem. Dagitoyton ti usarem iti talonmo tapno saankan nga aggatang kadagiti nakanginngina ken makadangran iti aglawlaw a ganagan. No makaimulaka iti rinibu a puon, kuarta daytan! Rumukrukbos iti tinawen ket di kad’ rumukrukbos met ti itedna nga ap-ap ‘ta bolsam? Asino ti makaibaga no sikanto ketdi ti umuna nga agmilionario iti pagilian gapu laeng iti kawkawwati?

Milionario gapu iti kawkawwati? Anian a nagganas a denggen, Kompad! Madika pay? Saan a makasugkar a denggen a kas iti “milionario, a, ta binukatotna met dagiti pondo!” Wenno “bimmaknang, a, ta isu met ti adda iti likudan ti pannakaaprobar dagiti panagminas a mapaspasamak!” Uray awan bumakbaknang no kasta! Anusak laengen ti agdeppel iti asin ngem ti kanayon a malanlanitan dagiti bagisna ngem agkakamakam met a sasao ti ibatbatoda iti liklikudak.

Pangur-urayam, kas nakunak itayen, Kompad, iballaetmo dagiti natnateng. Sa agtarakenka kadagiti dinguen. Di met ngata narigat a taraknem dagiti manok, Kompad? Anus laeng iti rugi. Ta awan met ket ti nagballigi a di nangrugi iti baba.

Maudi, Kompad. Kayatmo kadi a maiwawa dagita babassit pay nga annakyo? Awan ti kas iti adda nga ina a mangkitkita kadakuada. Umirut pay ti langenlangenyo a sangapamilia. Saan met ngata a palimed kenka ti adun a pamilia a nawarawara, kas man dagitay’ opisialtayo nga awan masnop a turongen ti kinaliderda gapu iti panagaaddayo dagiti kamengna. Di matukadan ti pirak ti ayat iti pagtaengan, kunam sa, Kompad! Ita, kayatmo kadi pay laeng nga agabrod ni Kumare, Kompad?

Ne, ne, ne, Kompad, dinak kusilapan, a! Ipapanmon sa met nga ipawilko ti yaadayo ni Kumare tapno makitkitak latta? Sika met! Dinak kad’ ipadpada kadagiti dadduma a mannursuro nga agkikinnallongda nga agkakadua. Patigmaananka laeng. Wenno ikkanka laeng iti pagpampanunotam.

Ket adda kenkan no denggennak wenno saan, Kompad! Basta kaniak, naibagakon ti kayatko a sawen. Maiturogko manen a natalinaay ti riknak iti kalapaw a nakalukat dagiti tawa. Imasnan ti mangbuya kadagiti  bituen kabayatan ti panangtiliwko iti riridepak a kaduak ti pamiliak!

(Gibusna)