Ania pagabrodem ni komadre?

DAYTOY kinarigat ti panagbiag, ammok, Kompad, ti rason no apay a kayatmo la unay nga agabrod metten ni Komadre. Wen, ammok pay nga adda apalmo kadagita kaarrubam a nagluposen ti panagbiagda manipud nagtrabaho iti sabali a pagilian ti kameng ti pamiliada. Adda koma met kasta nga aplayans iti balay, kunkunam ket ngata, Kompad, no makitam ti flat screen a TV ni Angkuan; wenno ti laptop ni Itong; wenno ti new model a selpon ni Lakay Sabas nga uray agrayuman sa aminen kenkuana ket permi pay laeng a paardiodna. Atiwna pay dagiti baro iti ilitayo.

Duma laeng ti adda anakna iti abrod, isansanamtekmo la ketdi, Kompad. Ania ketdin a rigat nga agpayso ti biag ditoy pagiliantayo, ania, Kompad? Et-etam pay laeng ti nakaet-et-eten a barikes. Awan sarday ti ingingina dagiti kangrunaan a kasapulan tapno agbiagka. Ti makapasuron, saan met a manaynayonan dayta sangkabassit a sueldom a kas allawagi. Ken maysa pay, awan met mabatbati kadagiti apitmo iti sangkabassit a talonmo. Ta abusta nagngina dagiti pestisidio ken ganagan, baraten pay laeng met dagiti komersiante ti produktom.

Daytoy la unay gasolina, Kompad. Di met ngata mailinged kenka ti kinapudno a naynay ti panagngatona. Ngem no ibabada met, ayna, bassit-usit laeng. Ta nalaka, ‘ya, ti mangpakawala lattan iti riniwriw a ganansia. Isu a kitaem ket kanayon ti protesta idiay Manila. Sobra met ngamin dagita a kompania ti langis, di kadi, Kompad? Di ket isuda koma ti kamaten ti gobierno, ‘nia? Sa ita, adtoy manen ti addang nga ingatoda kano amin a serbisio iti nadumaduma a sanga ti gobierno. Kas pangarigan dayta sakaem nga NSO bert sertipikit a P115 ita, maingatonto kanon iti 10 porsiento.

Nasayaat met ketdi ti rasonda, a, Kompad. Tapno kano sumayaat ti serbisioda. Pumardas ti kayatna a sawen. No dati a makipilaka iti agmalem, siguro agingga’t aldaw laengen no maipakat dayta nga addang. Sapay la koma ngarud, a, ta di serken ti anomalia daytoy baro a panggep ti gobiernotayo.

Ala, awanen ti maaramidanta pay dita, Kompad. Ipalugodta lattan kadagiti opisialestayo dagiti addang a mabalin a makatulong kadatayo nga umili. Ikarkararagantay’ ketdi ida tapno dida agturong iti Nakillo a Dana. Saan koman a manayonan dagiti nagburarog iti riniwriw ti gatadna a kape. Wenno dagiti namutittit nga NGOs a nagdawat iti pondo ti gobierno ngem dida gayam inar-aramat. No koma nailatang dayta para iti pagimbagantayo, Kompad, di kad’ nagsayaat koma! Ngem aganustayo, a, ta datayo met laeng ti nangted iti bileg kadakuada.

Wen, addaakon dita, Kompad, a di koma kasta ti isubadda kadatayo. Ngem ania ngarud ket nagramut sa metten ti kunniber iti pagiliantayo? Saan koma met, a!

Sublianta man ketdi ti panggepmo a mangpaabrod ken ni Kumare. Ammok, ulitek, ti kinarigat ti panagbiag ti umuna a rason no apay nga arapaapmo la unay a makaabrod met ni Kumare. Ngem ikkanka man pay iti pagpampanunotam sakbay nga ipamaysayo nga agassawa dayta a napanunotmo.

Umuna, anagem dagiti damdamag. Agsasaruno dagiti riribuk iti nadumaduma a pagilian ita. Aglalo la unayen idiay Syria ken Libya. Pati payen diay Ehipto, Espania ken adu pay a pagilian, Kompad. Kunak met nga ammom dagitoy ta managdengngegka met dita transistor a radioyo. Isu a dika koma agimbubulsek.

Total deployment ban ita ‘diay Syria, Kompad. Kayatna a sawen, maiparit a maminpinsan dagiti kailiantayo a mapan sadiay. Mapagawid metten dagiti adda sadiay tapno mayadayoda iti riribuk.

(Adda tuloyna)