Anib kontra manggagamud, kagat ti uleg, nailako bayat Kannawidan

VIGAN CITY – Saan la a nadumaduma a produkto dagiti nadumaduma nga ili ditoy probinsia ti nailako bayat ti Kannawidan Ylocos Festival no di pay dagiti nakaisigudan nga agas a nagiinnallawatan dagiti immuna a kaputotan.

Iti booth ti Nagbukel, kasla binunar ti maysa a lako ditoy a mapapati a nasamay a pangontra iti manggagamud, kasta met iti kagat ti uleg wenno aso.

Aw-awagan dagiti taga-Nagbukel daytoy a kayo a kasabang a segun kadakuada ket maala iti nasulinek a paset ti kabakiran iti lugarda.

Segun dagiti naglako, nagpaaramid pay ni dati a Gov. Luis “Chavit” Singson iti sarukodna manipud iti kasabang, a mapapati a nagbalin a nasamay a pinangontrana kadagiti manggagamud ken uleg.

Iti Baluarte a yan ti pagtaenganna, adu dagiti taraken ti dati a gobernador nga ayup a pakaibilangan dagiti tigre, kabalio, beklat ken dadduma pay.#