Annak dagiti politiko, baro a puersa iti sangguniang panlungsod ti Vigan

VIGAN CITY –  Agtutubo nga annak dagiti politiko ti agbalin a dominante a puersa iti  sangguniang panlungsod ditoy siudad iti panaglukat ti sessionna inton Hulio daytoy a tawen.

Lima nga agtutubo nga annak dagiti politiko ti nagwagayway iti napalabas nga eleksion lokal ditoy ket manamnama nga agbalin ti grupoda a nabileg a puersa a suportado kadagiti programa ken gannuat ti Ehekutibo nga idauluan ni nailayon a Mayor Eva Marie S. Medina ken iti Konseho iti babaen ni Presiding Vice Mayor Lourdes Baquiran.

Kas ninamnama dagiti agpalpaliiw iti politika iti Vigan City, ni Juan Carlo, anak ni Mayor Medina ken ni dati a Mayor Ferdinand Medina, ti nakagun-od iti kaaduan a butos para kadakuada a kandidato para konsehal.

Simmaruno kenkuana ni Kisses Marquisse Agdamag, anak ni nag-Konsehal Audie Agdamag. Saanen a nagkandidato pay ti laklakay nga Agdamag agsipud ta naungpotnan ti maikatlo a terminona a kas konsehal ti siudad.

Maikatlo a puesto ni dati nga Federated ABC President John Patrick Singson, anak ni Bokal Jeremias “Jerry” Singson.

Simrek met iti Magic 10 ni Kristen Figuerres, anak daydi nag-Konsehal Alfredo Figuerres.

Maikalima met ni Francisco Arturo Ranches III, anak ni dati a Konsehal Francisco Ranches, Jr. Nagkandidato ni Ranches iti babaen ti Liberal Party, partido ni Pres. Benigno Aquino III.

Kabarbaro a rupa ti nangiyalat iti maikapat a puesto, ni Joy Benette Orio.

Sabali pay a baro a rupa ti nakagun-od iti maikasiam a puesto, ni Ramil Arce, dati a sangguniang bayan secretary ti Vigan.#

Iti daytoy a panagpipili, dandani naiyanud dagiti beterano a politiko a pakaibilangan da Konsehal Constante Benzon (maikanem), Benedicto Jose Verzosa (maikawalo), ken George Villanueva (maikasangapulo).#