ANNINIWAN TI NAPALABAS

Sarita ni Rosalyn Del Prado

(Umuna a paset)

MADAMA ti komperensiami ken Mr. Alones, ti superbisor ti distrito ti Quirino, maipapan kadagiti report a maidatag iti division office idi matugtog ti ridaw ti opisina. Timmakderak ket kinitak no asino.

β€œNaimbag a malemmo,” inisemannak ti sangaili. β€œAdda kadi ni Mr. Alones?”

β€œAdda, sir,” insungbatko. β€œSumrekkayo, a.”

β€œUmayak agreport, sir,” kinuna ti sangaili ken ni Mr. Alones. β€œSiak ti imbaon ni Mr. Cruz a mangsukat ken ni Mrs. Corpuz.” Ni Mr. Cruz ti Schools Division Superintendent iti probinsia ti Ilocos Sur. Nagretiro itay napan a lawas ni Mrs. Corpuz, ti prinsipalmi iti Quirino Central School.

Inyawat ti lalaki ti papelesna. Binasa ni Mr. Alones. Kalpasanna, inyam-ammonak. Jose Ramos ti naganna. Taga-Vigan. Uppat a pulon ti tawenna. Baro. Kalalainganna ti pammagina iti tayagna a lima kadapan ken lima a pulgada. Panguloten, no umisem, agminar ti bugbugtong a kallidna.

β€œWelcome to Quirino, Sir,” kinunak.

β€œNapintas ti lugaryo,” kinunana. β€œNadalus ti angin, saan a kas iti Vigan a natapok ken napudot. Magustuan la ketdi ti bagik ditoy.”

β€œNo maanusanyo la ketdi ti rigat, Sir.”

β€œMrs. Ringis, di la mabalin nga awagam amin a mangisursuro?” kinuna ni Mr. Alones. β€œAdda mitingtayo iti library.”

β€œWen, Sir,” insungbatko.

Nabiit a naurnongkami iti library.

β€œNaanus met la ngata a kas ken ni Mrs. Corpuz?” sinaludsod ni Miss Tabboga, ti pangrapisen a maestra ti Maikamaysa.

β€œNalaing met iti panagkitak,” insungbatko.

β€œBaro kano pay,” kinuna ni Mrs. Reynon, ti in-charge iti Grade IV. β€œAddayta, gundawaymon, Andring,” inkalbitna ken ni Mrs. Dumbrique, ti biuda a maestra ti Maikadua.

β€œPadpadasennak a kalbiten ta kitaenna no diak tiliwen,” inkidday ni Mrs. Dumbrique. Nagkakatawakami.

β€œAwanen, nanglaylaykan, Manang,” kinuna ni lakayko. β€œItedmo la’ngen kadagiti ub-ubbing barbareng no maigawid ditoy Quirino.” Insungo ni lakay ni Miss Tecson, ti mangisursuro iti Home Economics. Nasuroken a tallopulo ni Miss Tecson ngem kalaslasbanganna.

β€œSiak manen ti nakita ni Manong Lando,” kinuna ni Nenita.

Kas guidance counselor, managadalak iti karirikna ti tao iti nadumaduma a situasion. Idi sumrek da Mr. Alones ken Mr. Ramos, ni Nenita ti pinaliiwko. Kellaat ti ibebessag ni Nenita. Naikuleng met ni Mr. Ramos a bulon ti panagkarenken ti nawada a mugingna. Ngem apagdarikmat laeng, immisem ni Mr. Ramos ket intuloyna ti nakiam-ammo kadakami.

Iti recess, inyawis ni Mrs. Almendras, ti Coop Teacher, ti panagmeriendami. Nakitungtong ni Mr. Ramos ngem masansan ti itataliawna ken ni Nenita. Pamrayan ni Nenita ti agdumog wenno sipapasnek kampay a dumdumngeg iti sasawen ni Mrs. Reyes. Naulimek man ita ni Nenita idinto a saan met a kasta. Madamdama, nagpadispensar ket imbagana nga adda pay board work nga ikamakamna.

Idi agawidkami, naisalpikak ken ni lakay dagiti napaliiwko. Amin la a madmadlawmo, nakunana.

Dakkel ti nagbaliwan ni Nenita. Iti recess, nakairuamanmi ti agtutungtong iti library. Ita saanen a rumrummuar iti kuartona. Iti bigat, masapa a sumrek, agdiretso iti kuartona ket sa la rummuar iti flag ceremony. Iti malem dinakon urayen nga agawid. Kanayon a kasla nauneg ti pampanunotenna ket saanen a managisem. Kimmuttong.

β€œAdda kadi kinagura ni Nenita kadatayo?” nakuna ni Mrs. Almendras.”

β€œAwan met ti ammok,” kinuna ni Miss Alcedo.

β€œAdu ngata ti trabahona,” inkalintegak ni Nenita.

Inkeddengko a kasaritak. Rinantak iti kuartona iti maysa a malem.

β€œAdda pay trabahuem?” inamadko.

β€œAwanen, Manang,” insungbat ni Nenita. β€œAgawidakon.”

β€œAgkuyogta ngaruden,” kinunak.

Tinulongak a nagiserra kadagiti tawa. Inalikumkomna dagiti gargaretna. Kalpasan ti panangkandadona iti ridaw rimmuarkami iti pagadalan.

β€œAmmom,” kinunak, β€œdumdumlaw man dagiti kaduatayo kenka.”

β€œApayen, Manang?”

β€œSaanka metten a makium-ummong kadakami.”

β€œAdu ngamin ti asikasuek iti klasek, Manang.”

β€œUray ni Mr. Ramos, dumdumlaw kenka.”

Napasardeng ni Nenita. β€œA-ania ti nasasaona, Manang?”

β€œKaska la kano kigaw.”

β€œA-awanen ti sabali a nasaona, Manang?”

β€œDayta laeng,” kinunak. β€œAnia koma pay ti masaona maipapan kenka?”

Saan a nagtimek. Indarumogna ti nagna.

β€œNenita, adda kadi problemam?”

β€œA-awan, Manang.”

Immangesak iti nauneg. β€œAla, awan no awan. Dika ngarud agpuppupok latta iti kuartom. Umaliwaksayka sagpaminsan tapno awan ti dumlaw kadagiti kakadua.”

(Maituloyto)