Anomalia iti panagadu dagiti Chinese iti Pilipinas

INVESTMENT or invasion wenno maibilang nga in-inut a panagraut ti agtultuloy a panagadu iti pagilian dagiti nasuroken a 1.5 million a Chinese nga agtrabaho kadagiti adu a kompania ti Philippine Offshore Gaming Operations (POGO)?

Naklaat dagiti Pilipino iti naibulgar iti Senate hearing nga indauluan ni Senador Rizza Hontiveros ti kaadun dagiti Chinese iti pagilian ta kayarigannan ti “borderless” no sumangpetda gapu ti pannakikumplot dagiti napasuksokan a personel iti Bureu of Immigration (BI).

Imbulgar ni Hontiveros ti pastillas modus operandi iti BI a possible a manggubuay iti peggad iti “Chinese invasion” gapu iti kalakada a sumrek iti pagilian babaen ti panagpasuksok dagiti travel agencies kadagiti agserserbi iti dayta nga ahensia ti gobierno. Inrakurakna a ti sistema ket nagbalinen a “centralized” a nangpadaras ti iseserrek dagiti Chinese kalpasan ti panagbayad dagiti travel agency iti service fee a P10,000 tunggal maysa a sumangpet a Tsino. Impakaammona nga iti nagkauna nga operasion ti pasuksok ket nakusikos ken nabungon iti papel a kasla pastillas, ti kendi a gatas, ngem iti agdama ket nakasobren ti pasuksok.

Impabuya ni Hontiveros ti video a panangsabat ken panang-escort ti maysa nga Immigration Officer kadagiti simmangpet a Chinese iti Ninoy Aquino International Airport (NAIA), nagturongda iti opisina a nakaisayangkatan ti verification ti kinatao ti Tsino iti listaan. Imparangna pay dagiti screenshots ti Viber groups a naglaon kadagiti nagan ken detalye dagiti flights ken ladawan dagiti Chinese.

Inlawlawag ni Hontiveros a no million a pisos ti maaw-awat dagiti kurap a BI personnel ket dumanonen iti billion a pisos dagiti na-kickback iti anomalia a kasukat ti panangliput iti pagilian gapu ta pinastrekda dagiti Chinese iti Pilipinas gapu iti pasuksok.

Iti hearing, naglibakan dagiti opisial ti BI nga ammoda dagiti alegasion ti anomalia. Iti sumaruno a hearing, imbutaktak ni Immigration Officer Allison Chiong kadagiti senador a 10 a porsiento laeng kadagiti BI personnel iti NAIA ti awan ti pannakainaigna iti pastilla scam. Innagananna pay dagiti agdama ken sigud a BI personnel a karaman iti anomalia.

Inaklonen ni Presidente Rodrigo Duterte a naammuanna ti intelligence report maipapan iti anomalia iti BI.  Minandarna ni BI Commissioner Jaime Morente ti pannakaiwayat ti naan-anay nga imbestigasion ken pannakasuspende dagiti adda pannakainaigna iti anomalia.

Addan dagiti BI personnel a nasuspender gapu iti mapapati a pannakainaigda iti anomalia, ket nakiddawen ti tulong ti National Bureau of Investigation a mangisayangkat iti naun-uneg nga imbestigasion. Na-reshuffle metten dagiti BI personnel iti NAIA.  

Addanto ngata nangato nga opisial ti BI ti maikkat iti serbisio ken maidarum iti kurapsion wenno agpatingganto laeng iti pannakasuspende dagiti sumagmamano nga opisial ken panagreliebo dagiti BI personnel? 

Nabayagen nga adda dagiti madamdamag nga anomalia iti BI iti panagpastrek dagiti foreign nationals, ken ti pannakawayawaya dagiti ganggannaet a matiliw nga aglabsing iti linteg. Iti agdama nga administrasion, addan dagiti kaso iti naglabas a nakainaigan dagiti abogado ken nangato nga opisial ti BI a naikkat ken naidarum gapu ti panagawatda iti pasuksok tapno saan a makasuan dagiti ganggannaet a natiliw gapu iti panagtrabahoda iti illegal online games.   

Inaklon ti BI a dumanonen iti 1.8 million a Chinese dagiti simrek iti Pilipinas kadagiti kaudian a tawen, ken agtatrabaho kadagiti kompania ti POGO.  

Immadu dagiti agsangpet a Chinese iti Pilipinas manipud idi 2016 a nagakem ni Presidente Duterte ken nalukatan dagiti kompania ti POGO babaen ti Philippine Gaming Corporation. Ibilang ti PAGCOR a dakkel nga investment ti POGO ket billion dagiti mapaspastrek ti gobierno a buis. Maipawil ti amin a klase iti sugal sadiay China, isu a naayat dagiti Chinese nationals iti online games.

Impakaammon ti Bureau of Internal Revenue nga adu dagiti kompania ti POGO a saan nga agbaybayad iti umno a buis ket addan pinaserraanda. Impeksa pay iti naglabas a tawen da Defense Secretary Delfin Lorenzana ken National Security Adviser Hermogenes Esperon ti posible a dakes nga epekto iti seguridad ti pagilian ti kaadun dagiti Chinese.  Makaalarman ti kaadu dagiti Chinese a mainanaig iti human trafficking, prostitution, kidnapping ken dadduma pay a krimen.

Makapadanag ti agtultuloy a panagadu dagiti Chinese iti agdama nga administrasion a nasinged ti pannakilangenna iti Chinese government iti laksid nga agtultuloy a panagsakup ti China iti teritorio ti pagilian iti West Philippine Sea. Uray indeklaran ti International Tribunal nga illegal ti 9-dash line a pagbasbasaran ti panagtagikua ti China, agtultuloy ti  panagaramidda kadagiti military and defense facilities iti West Philippine Sea.

Naindaklan ti akem dagiti nagkauna a Chinese iti pagilian, ken adu kadakuadan dagiti nagballigi a negosiante ken nangpabaknang ti ekonomia ti pagilian. Ngem makaalarma ti kinaagresibo ti China a mangsakup iti West Philippine Sea.

Idi World War II, sakbay ti panangraut dagiti Japanese Imperial Forces iti Pilipinas ket adun dagiti nalimed nga intelligence operatives ti Japan iti pagilian. Iti panagadu dagiti Chinese iti Pilipinas, awan ngata ti nalimed a plano ken panagkumplot dagiti agpapaay kadagiti dua a gobierno?