Antalan, Pacnis, Fabito, napadayawan Iti GF Convention

BACNOTAN, La Union – Tallo a mannurat a contributing writers iti Tawid News Magasin ti immawat iti pammadayaw manipud kadagiti nadumaduma a pasalip ti Literatura Ilocana bayat ti GUMIL Fiipinas Seminar and National Convention a naangay sadiay Don Mariano Marcos State University sadiay Brgy. Sapilang, Bacnotan, La Union  idi Abril 20-22 itoy a tawen.

Inyalat ni Danilo Antalan ti umuna a premio iti pasalip iti sarita, ken umuna met a gunggona ti inyawid ni Jobert M. Pacnis iti pasalip iti daniw.

Pinangabak ni Antalan, ace reporter iti DZTP Candon City ken premiado a mannurat ken agsursurat iti sarita, damag ken salaysay iti Tawid News Magasin, ti saritana a “Dagiti Nangabak” iti Umuna a Pasalip Alviya nga inesponsoran ti Alviya Literary Foundation.

Immawat ni Antalan iti P15,000.00 a premio.

Pinangabak met ni Pacnis, taga-Barangay Ammubuan, Ballesteros, Cagayan, ken agsursurat iti salaysay ken sarita iti TNM, ti  “Dandaniw ni Balong” a naisalip iti poem writing contest ti Cabie Pinili.

Kabayatanna, immawat iti pammadayaw ni Dexter Marin Fabito, barangay kagawad ti Balingit, Pamplona, Cagayan, gapu iti panangabak ti dua a daniwna ken maysa a saritana.

Maikatlo a Gunggona ti daniwna a napauluan iti “Ti Balaymi” iti 4th Prof. Honor Blanco Cabie Premio (Cabie Pinili), Daniw a Para Ubbing;  maikadua a gunggona iti 14th  Ablan Valdez Awards for Iluko Literature (AVAIL) babaen ti daniwna a napauluan iti “Agmalem a Pinta” ken maikatlo a gunggona iti saritana a “Talon” a naisalip iti Salip ti Sarita para kadagiti Agdadamo a Mannurat ti AMMA Foundation Literary Awards.#