Footer

Antalan, Pacnis, napadayawan iti konbension nasional ti GUMIL Filipinas

CURRIMAO, Ilocos Norte – Immawat iti pammadayaw ti dua a mannurat a contributing writers iti daytoy a pagiwarnak gapu iti panangabak ti saritada iti Maika-42 a national convention ti GUMIL Filipinas a naangay iti Pangil Beach Resort ditoy nga ili idi Abril 9-11, 2010.

Ni Danilo B. Antalan, ace reporter ti DZTP ken contributing writer iti Tawid News Magasin, ti nangiyalat iti umuna a gunggona iti  Panagsurat iti Nobelita iti Iluko ti 1st Fele Mann Iluko Novelette Writing Contest.

Pinangabak ni Antalan ti saritana a “Sarsuela” ket immawat iti P20,000 kas gunggona ken plake.

Maikadua a gunggona ni Reynaldo A. Duque ti Candon City babaen ti saritana nga “Arakup dagiti Agpatnag” ket immawat iti P17,000 a cash prize idinto a P15,000 ti inawat ni Estella B. Guerrero ti Pangasinan ken Siudad ti Baguio gapu iti pannakagun-od ti saritana a “Balangkantis a Namnama” iti maikatlo a gunggona.

Ni Fele Javier Mann, presidente ti Filipino Club Darwin Inc. iti Australia, ti esponsor ti salip babaen ti pannakitinnulong ti GUMIL Filipinas.

Iti Salip iti Sarita ti SABALI (Savella-Baclig Literary) Awards, inyalat ni Jobert Pacnis ti Ballesteros, Cagayan ken contributor iti Tawid News Magasin ti umuna a gunggona. Pinangabak ni Pacnis, maysa nga Electronics and Communications Engineer, ti saritana a “Maestro Teody”.

Maikadua a Gunggona ni Jovito F. Amorin ti PLDT babaen ti saritana a “Ti Lalaki a Pakaikamangak”.

Maikatlo a Gunggona ni Virgilio D. Domaloy, tubo iti Sison, Pangasinan ken agdama a sheriff iti regional trial court ti Urdaneta, babaen ti saritana a “Dagiti Kumpet iti Tadem.”

Inesponsoran da agkaingungot a Quezon City Regional Trial Court Judge Vivencio S. Baclig, maysa met a mannurat a tubo ti Cabugao, Ilocos Sur ken Nenita F. Baclig, ti nasao a pasalip.

Aganay 200 nga Ilokano a  mannurat, mangisursuro, estudiante, researchers, ken dadduma pay manipud iti nadumaduma a probinsia ditoy pagilian ken iti ballasiw-taaw ti timmabuno iti nasao a  konbension nasional ti  GUMIL Filipinas.

Karaman kadagiti dimmar-ay iti konbension da Currimao Mayor Rosario Go, Dr. Domingo Landicho, professor iti University of the Philippines, ken director iti Indie film Ron Bryant.

Tinawen nga angayen ti GUMIL Filipinas ti konbension para kadagiti mannurat nga Ilokano, agdadamo man wenno bangolan ken uray dagiti agessem iti panagsurat.#