Apagtapog pay laeng ti bulan ti Agosto, 4 naireport panaglabsing iti RA 8294

VIGAN CITY – Iti baet ti kampania ti kapolisan maikontra iti illegal a panagikut iti paltog ditoy probinsia, uppat nga insidente ti naireport a panaglabsing iti RA 8294 iti umuna nga uppat nga aldaw ti daytoy a bulan.

Idi agarup ala una ti bigat ti Agosto, nakaawat ti polis iti Bantay, Ilocos Sur iti tawag manipud iti Metro Vigan Cooperative Hospital mainaig ti aksidente a pannakapaltog ti tumeng ni Richard Paet y Pato, 19, baro ken residente iti Barangay Paing, Bantay.

Iti panagimbestiga dagiti polis, naammuan a bayat ti panaggiinum dagiti agkakalugaran a  Paet, Arnel Salteras y Cortez, 23, baro, ken Jayson Pascua y Unite, 19, baro, iti waiting shed ti barangay, mapapati nga inay-ayam ni Salteras ti maysa a paltog ket aksidente a napaltoganna ni Paet.

Iti ospital a nakaitarayan ni Paet, maysa a lalaki a nainaganan kalpasanna a ni Pascua ti simmangpet a naglugan iti motorsiklo ket imbagana a kadua ni Paet ngem nagsuspetsa dagiti polis ket sinukimatda ti compartment ti lugan daytoy a nakaduktalanda iti maysa a homemade cal. 22 magnum revolver nga addaan iti tallo a bala ken maysa a kapsula.

Naginnareglo ti partes da Paet ken Salteras ngem napilaanen iti kaso a  panaglabsing iti RA 8294.

Idi agarup 1:40 ti malem daytoy met laeng nga aldaw, maysa a tawag iti telepono ti naawat ti Sinait police manipud iti maysa a residente a nagkuna nga adda nagprobokar a lalaki a nakalugan iti traysikel a Yamaha RS iti Barangay Pug-os, ditoy nga ili.

Nalabsan dagiti nagresponde a polis ti traysikel a nakaparking iti abaga ti kalsada nasional iti Barangay Calanutian ket idi rinikisada ti suspek a nabigbig a maysa a Jerwin Agdeppa y Harana, 24, baro ken residente iti Barangay Magsaysay, Sinait, nakakumpiskada iti maysa a cal. 45 pistol Armscor nga addaan iti maysa a magazine assembly ken uppat a bala.

Naipan ti suspek a mapapati a nabartek, agraman ti nakumpiska kenkuana a paltog iti police station para iti dokumentasion ken disposision.

Naipatuloden ti kaso a panaglabsing iti RA 7294 maikontra ken Agdeppa iti opisina ti provincial prosecutor iti Vigan City.

Idi Agosto 3, maysa met a concerned citizen ti nangitawag iti polis iti Cabugao ti pannakakitana iti nagtagiimet iti paltog a dua a lalaki a nagkalubbon iti nangisit a motorsiklo a Euro iti Barangay Sabang, Cabugao.

Nagresponde dagiti polis iti panangidaulo ni Police Chief Inspector William Nerona ket idi addadan iti dalan, nasalamaanda dagiti suspek iti Sitio Panay-ogan, Barangay Daclapan.

Idi pinasardeng dagiti polis dagiti suspek, pinadas dagitoy ti naglibas ngem kinamat ida dagiti polis agingga iti naipiskotda ida.

Nakasamsam dagiti polis iti ikut ni Nelson Robles Aganad, 27, baro, ken residente iti Barangay Turod, Cabugao iti cal. 45 pistol a nagmarka iti Norinco nga addaan magasin a naglaon iti uppat a bala; idinto a maysa a tooter a mapapati nga addaan iti marijuana residue ti naala iti ikut ni Esmael Soto y Silvania, 19, baro, agparparti ken residente met laeng iti Barangay Turod ti nadakamat nga ili.

Kabayatanna, idi Agosto 4, timmawag iti polis ti Sta. Cruz babaen ti telepono ni  Alfred Tamayo, head guard ti PMFTCI a masarakan iti Barangay Sidaoen, Sta. Cruz, a nangitimbreanna a nakangegda iti putok iti sanguanan ti pasdek.

Nagresponde dagiti polis ket iti panagimbestigada, naammuan a dua a di nabigbig a lalaki a nakalugan iti motorsiklo ti nagpaputok iti sanguanan ti pasdek ti PMFTCI.

Kinuna ti guardia a nagpaamianan dagiti suspek sada manen a nagpaputok.

Simmangpet dagiti elemento ti ISPPSC nga indauluan ni Police Inspector Ariza a kas back-up ngem nakapanawen dagiti suspek.

Madama ti panagimbestiga mainaig iti nasao nga insidente.#