Footer

Apay a saan a mapasardeng ti panagraira ti illegal a droga?

ISU met laeng a saan a mapasardeng ti panagraira ti illegal a droga iti Pilipinas iti laksid dagiti rinibribun a natay ken natiliw iti nadara a kampania maikontra iti illegal drug trade ta mismo a maiserrek dagiti kontrabando kadagiti puerto babaen ti pannakikumplot dagiti rinuker nga agserserbi iti gobierno.

Nakaskasdaaw ti pannakadiskobre dagiti nagtipon a puersa ti Philippine Drug Enforcement Agency, ken Bureau of Customs iti pannakasamsam idi Agosto 7, 2018 iti kagudua ti tonelada wenno 500 a kilogram a shabu a naipalaon iti magnetic lifter ken naikarga iti naabandonaran a container van sadiay Manila International Container Terminal a naggapu iti Taiwan. Inrakurak da PDEA Director General Aaron Aquino ken BOC Director Isidro Lapeña nga aggatad ti nasamsam a shabu iti P3.4 Billion, ken ti dua a magnetic lifter ket paset laeng ti ad-adu pay a kontrabando a nairuaren iti MICT.

Kalpasan ti sumagmamano nga aldaw, natunton dagiti operatiba ti PDEA iti maysa a bodega sadiay ili ti General Mariano Alvarez, Cavite dagiti uppat pay a magnetic lifter a mapapati a nayon dagiti dua a nasamsam sadiay MICT a naglaon iti 500 kilo a shabu, gapu ta naduktalanda babaen kadagiti sniffing dog a nakaangot kadagiti residue a nabati iti lifter, ken agpada pay dagiti consignee ken markada.

Inrakurak ni Aquino nga awanen ti linaon dagiti uppat a mangnetic lifter a natunton sadiay GMA, Cavite, ken nairuaren daytoy iti warehouse compound kas ipakita ti video iti CCTV camera iti bodega. Impalgakna nga aggatad ti shabu a naipalaon kadagiti uppat a magnetic lifter iti P6.8 Billion, a mapapatin a mailaklakon iti underworld.

Nagsagrap kadagiti adu a kritisismo ti kaudian nga illegal drug smuggling iti BOC gapu ta idi 2017 ket napasamaken ti pannakaiserrek iti mismo a BOC iti shabu nga agdagsen iti 604 a kilo ken agbalor iti P6.4 Billion, a gapu ti nakapilitan a naglusulosan ni sigud a BOC Director Nicanor Faeldon ken dadduma pay nga opisial ti ahensia. Nagbalin a kontrobersial dayta a kaso ta nangisayangkat pay ti Senate Blue Ribbon Committee iti imbestigasion a nakaawisan dagiti sigud a nangato nga opisial ti BOC, ti custom broker ken fixer Mark Taguba da sigud a Davao City Vice Mayor Paolo Duterte, ken Presidential son-in-law Atty. Maneses Carpio.

Immandaren ni Justice Secretary Menardo Guevarra iti National Bureau of Investigation nga imbestigarenda ti baro a kaso ti P6.8 Billion illegal drug smuggling iti BOC a possible nga adda pannakainaigna dagiti agserserbi iti daytoy nga ahensia, ken dagiti pribado a shippers, brokers, cargo handlers, warehousemen, ken law enforcement agents.

Nangrugi metten ti imbestigasion iti House of Representatives Committee on Dangerous Drugs iti P6.8 Billio illegal drug smuggling case.

Nakalkaldaang dayta a baro a kaso ti illegal drug smuggling iti BOC ta iti laksid nga idauluanen daytoy ni Lapeña a sigud a Director ti PDEA ta naulit manen ti pasamak idi panawen ni Faeldon a sinukatanna. Iti laksid dayta a kaso, impalgak ni Presidential Spokesman Harry Roque a sitatalek pay laeng ni Presidente Rodrigo Duterte ken ni Lapeña iti lideratona iti BOC. Kinanunonganna ni Lapeña nga awan ti linaon a shabu dagiti mangnetic lifters a natunton sadiay GMA, Cavite gapu ta awan ti narekobre ti PDEA nga illegal a droga.

Nagkas-ang daytoy a pasamak ta iti laksid ti kasta ti kaaduna nga illegal a droga ket nakalaklaka a naiserrek iti Pilipinas babaen ti panagdalanna a mismo iti puerto a sakup ti BOC gapu ti pannakikunsabo dagiti agserserbi iti ahensia.  Ngem kasano a saan a maulit-ulit ti kasta a kaso no dagiti opisial nga agliway kadagiti responsibilidadda, ket agtalinaed ti talek ken kompiansa ti Presidente a nangdutok kadakuada iti akemda?

Maipalagip nga iti imbestigasion ti Senado iti kaso ti P6.4 Billion illegal drug smuggling case iti 2017 a nakainaigan ni Faeldon idi isuna pay ti BOC Director nga iti laksid dagiti rimmuar a nagkuranganna gapu iti command responsibility, ket imbes a nakugtaran isuna, naglusulos laeng iti posisionna, ken iti saan a mabayag, nadutokan manen a Deputy Administrator iti Office of the Civil Defense iti Department of National Defense.

No pudno a serioso ti agdama nga administrasion iti pannakaparmek ti panagraira iti illegal a droga, rumbeng nga ilungalong ti Presidente ti serioso a panagimbestigar ti DOJ ken dagiti maseknan a komite iti Senado ken House of Representatives, ket no ania man ti resulta ken rekomendasionda ket nasken nga aksionan wenno suroten dagiti maseknan nga ahensia.

Nasken a sino man a tattao dagiti mayimplikar kadagiti imbestigasion ket naan-anay ti pannakasukimat ti kabibiagda tapno maduktalan ti kinapudno no adda pannakainaigda iti pannakaiserrek iti pagilian dagiti illegal a droga, saan ketdi a mayaw-awan dagiti imbestigasion no dagiti mainaig ket dagiti personalidad nga adda dagiti nangato nga opisial a pagkaptanda.

Nasken ti naan-anay a pannakadalus ti BOC kadagiti rinuker nga opisial ken empleado a maibilang nga anay a mangdaddadael ti ahensia a babaen ti pannakikumplotda kadagiti drug lord ket naglaka a makastrek iti puerto dagiti illegal a droga. Masapul a dagiti maduktalan nga agbasol wenno agliway nga opisial iti BOC ket maikkatdan a mamimpinsan iti gobierno, saan ketdi a mayakarda laeng iti sabali nga ahensia ta no kasta ket agtalinaed met ti impluensiada, ken maitultuloyda dagiti dakes nga aramidda.

No napudno ti gobierno iti gandatna a mangpaksiat ti panagsaknap ti illegal a droga, nasken a ti puon ti putdenna, saan ketdi a dagiti nagbabassit a sanga. Rinibun a pamilia dagiti agladladingit gapu kadagiti ay-ayatenda a napapatay a suspek nga aglaklako iti gramo-gramo a shabu, kabayatan nga agpagpaggaak dagiti drug lord ken kakumplotda nga agiserserrek iti BOC kadagiti toneleda nga illegal a droga. (Eden Alviar)