sinursuran-banner-sqSinursuranNi Jobert M. Pacnis

Apay, Adda COC ‘Ta Selponmo, Sir?

Kolum ni Jobert M. Pacnis

(Umuna a Paset)

 

 

AMMOM ti kayat a sawen ti COC iti selpon wenno iti internet, ka-Sinursuran?

Ala, no saan pay, ilawlawagko laeng bassit ta bassit met ti ammok kadaytoy. No apay, maammuamto damdama.

Clash of Clan ti kayatna a sawen dayta a COC– saan a certificate of candidacy wenno certificate of (leave) credits (saan nga utang, wen?) kadagiti mannursuro.

Maysa a klase ti ay-ayam iti internet ti COC. Adda ‘tay kampo a rautem wenno rautenyo kadagiti kakaduam (clan). Kas iti kaaduan nga ay-ayam, adda level daytoy. Rumikrikut a rumikrikut ti laban no kasta a ngumatoka iti level.

Nalabit dika ngata mamati a dayta laeng ti ammok kadayta nga ay-ayam. Ket segun pay dayta kadagiti mangmangngegak kadagiti nailuoden nga agay-ayam. Kas kaniak, adu la ketdi dagiti am-ammom a daytoy laeng ti sangkasaoda, sangkasangoda no iggemda ti nagpipintasan a selponda.

Ket no kunaek a diak pay pulos a nay-ayam dayta a COC, mamatika ngata? Sabagay, maawatanka no kasta. Ta iti kinasikatna kas ay-ayam, kasla di man nakappapati a diak pay pulos pinadas. Ngem ania ngarud no isu met ti agpayso?

Ta kasano ngamin a maay-ayamko iti lokal (diakon ibaga ti brand-na) laeng a selponko? Lokal kunak ta saan a touch screen. Ken walo a tawennan kaniak daytoy, agraman ti original pay laeng a sim card-na. Panunotem laengen no ania pay laeng ti model ti selpon idi.

Ad-addan ti mulagatmo, saan? Ngem ania ngarud manen no isu met ti pudno?

Ket saan a diak makaisem no manunotandak dagiti adalak no kasta a panagdadalus iti malem a kampay idi agay-ayamak iti COC iti selponko. Paiddaek ngamin daytoy ket kuditek a kasla tatskrin. Yisla-islaydko pay ti ramayko iti screen—a kasla napaypayso nga agay-ayamak.

“Apay, adda COC ‘ta selponmo, sir?” amadenda kaniak dagiti ubbing a dida mailemmeng ti isemda.

A sungbatak laeng iti tung-ed.

A pagkakatawaanda ta imposible dayta iti klase ti selpon nga adda kaniak.

Ngem ar-aramidek laeng ti kasta tapno mapalag-ananda iti trabahoda ket adda pagkakatawaan iti natuok nga agmalem a kas mannursuro ken, wen, pangkantiawko payen kadagiti awan ti maubrana no di ag-COC no kasta a nakakonektada iti internet. Kasla daytoy laengen, wenno ditoy laengen, nga agtaytayyek ti lubongda.

Nalabit napaliiwmon dagiti empleado kadagiti opisina ti gobierno a kasla makumikomda a kanayon kadagiti selpon wenno computer-da. Pagarupem la ketdi met nga adu ti trabahoda, ti katransaksionda iti selpon wenno laptop. Antagayam, no dida agpepesbuk, COC ti sangsanguenda. Banag a nagalas a maar-aramid.

Ket kunkunak iti bagik, naimbag la ketdin ta saan a sopistikado ti selponko ta diak ket koma metten nailuod iti dayta nga ay-ayam (kasta metten daytay kunkunada a Candy crush). Ken naimbag la ketdin ta awan bukodko a wifi tapno diak maikonekta a kanayon iti internet ‘toy nanumo nga ar-aramatentayo nga agsurat. Di kad’ maliklikak dagiti pakailuodan a parnuay dagiti kabaruanan a ramramit?

Kas kadagiti dadduma a pakailuodan, addada dagiti dakes nga epekto daytoy. Ket siguradoak nga ammo dagiti maseknan. Laeng, saanda a malabanan ti guyod ti pannakailuoddan kadagiti ay-ayam ken uray payen kadagiti social media.

Mapalpaliiw nga aglalaok ti maipoposte ita iti facebook, iti twitter, iti instagram ken dadduma pay a social networking site. Agsasaruno dagita a panagiposte. No arisiten, kasla saanen nga ib-ibbatan dagiti maseknan dagiti gadgets-da. Aglalo dagiti makunkuna nga i-Gen (natratartayo idin daytoy).

Ita, kitaem, adalem ti bagim no maysaka metten a nomophobic. Iti kasta, makaalut-otka pay.

Ania ngamin, aya, daytoy a nomophobia?

Maysa nga abbreviated wenno napagtitipon a balikas a naparnuay agwalo a tawen itan. “No mobile phone phobia” ti kayatna a sawen.

Makuna a maysakan a nomophobic no maminsan nga agbaliw ti mood, ti kaririknam, ti panagug-ugalim no napukaw wenno mapukpukaw ti selponmo. Saanka a makaidna. Agpupungtotka. Ti makadakes pay, uray no nalobat laeng wenno no network coverage, saanen a maipinta ‘ta rupam. Agmumuriotka. Ti la pagsiusiudotam!

Saan laeng a dagita ti pagilasinan a nomophobic ti tao. Pagarigan, saanka a nakakonekta wenno nakasirip iti facebook-mo. Ket kellaat a mapanunotmo a a maudikan iti damag wenno maudikan kadagiti papagayammo kadagiti pagpapatangan. Baka no ipatoda pay a dimo ammo dagiti kakaduam. Ket mismisuotanda ti liklikudam.

Dayta a pampanunot, ipasimudaagna, segun iti panagadal, a maysaka metten a nomophobic. Pagbutngamon ti bagim. Aburidokan.

(Adda tuloyna)