Apit a pagay, ad-adu ngem kasapulan ti rehion: DA regional director

SAN JUAN, Ilocos Sur- Kinuna ti regional director ti Department of Agriculture nga ad-adu ngem iti kasapulan ti rehion ti maap-apit a pagay ket saan nga apektado daytoy iti krisis ti bagas.

Daytoy ti impalgak ni Atty. Cipriano Santiago, regional director ti Departamento ti Agrikultura bayat ti Farmer’s Forum  a naangay iti BArang-ay demofarm ditoy nga ili idi Mayo 7 a dinar-ayan dagiti mannalon,municipal agriculture officers, sumagmamano nga opisial dagiti local government units, representative ti DA, NFA, Nueva Segovia Consortium of Cooperatives ken dadduma pay nga NGOs.

Nupay kasta, inannugot ni Santiago a saan nga umdas ti apit a bagas iti intero a pagilian tapno mapakan ti populasion nga umabuten iti  88 milion.

“Agkurkurang a talaga iti 10% isu a daytoy met ti ang-angkaten ti pagilian iti Vietnam ken Thailand,”inlawlawag ti regional director.

Kinuna pay ni Santiago a ti ingingina ti  komersial a bagas ket resulta laeng ti panagpangato ti komersial nga abuno idinto nga innayonna a manipud iti P900,  umaboten ti presio ti abuno iti nasurok a P1,500 kada sako.

Kinuna ni Santiago a plano ti DA nga ad-adda  a paaduen ti apit iti rehion uno tapno makatulong nga agsuplay iti bagas kadagiti kabangibang nga rehion.

Kinunana a maysa a target ti ahensia ti pannakaipasdek ti 32 nga small water irrigation projects tapno umadu pay ti talon a mamulaan iti pagay iti tiempo ti kalgaw.

Dinakamat ti regional director nga iti agdama, aganay a 303,000 nga ektaria ti mamulmulaan iti first crop idinto a 77,000 nga ektaria laengen iti second crop, isu a masapul ti irigasion ditoy.

Kinunana a mangnamnama ni a patgan ni Presidente Gloria Macapagal Arroyo ti uray kagudua laeng ti bilang dagiti SWIP a kiniddawda agsipud ta maysa kadagiti prioridad ita ti administrasion ti proyekto ti irigasion.

Innayon ni Santiago a guyguyugoyen ti DA dagiti mannalon nga agusar ti organiko nga abuno tapno malakaanda iti gastos iti farm inputs.

Kinunana a sisasagana ti ahensia a mangipaay iti counterparting scheme kadagiti farmers’ organization wenno LGUs a mayat a maaddaan iti shredder a mausar iti panagaramid iti organic fertilizer.(Mancielito S. Tacadena/NBN Vigan)