Apostolic Nuncio, sinangaili ti Ilocos Sur

VIGAN CITY – Nabara a pammasangbay ti impaay ti probinsia nga Ilocos Sur iti  Apostolic Nuncio to the Philippines iti isasarungkarna iti probinsia idi Agosto 25.

Maysa nga state dinner ti inangay ti gobierno probinsial kas panangpadayawda iti isasangpet ni Most. Rev. Guiseppe Pinto, D.D. a dinar-ayan dagiti opisial ti probinsia iti panangidaulo da Gov. Luis “Chavit” Singson, Vice Gov. Deogracias Victor Savellano, Cong. Ryan Singson, dati a House Deputy Speaker Eric Singson, dagiti bokal, dagiti pangulo dagiti provincial ken national offices ken dagiti mayor iti agduduma nga ili ti probinsia.

Dimmar-ay pay ditoy da Archbishop ti Nueva Segovia Ernesto Salgado, Archbishop Orlando Quevedo, Archbishop Socrates Villegas ken dagiti papadi ti Archdiocese ti Nueva Segovia.

Iti pammasangbay a mensahena, kinablaawan ni  Singson ti Apostolic Nuncio kagiddan ti panangibagana a sapay koma ta magustuanna ti pakabuklan ti probinsia.

Nagyaman met ni Most Rev. Pinto iti panangsangaili kenkuana ti probinsia.

“Nagpintas a lugar ti Ilocos Sur. Ngem itoy nabara a pammasangbayyo kaniak, naamirisko a dagiti gayam umili ti pudpudno a gameng ti lugar,” kinuna ti Apostolic Nuncio.

Adda iti probinsia ni Most Reverend Pinto tapno saksianna ti episcopal ordination ni Most Rev. David William V. Antonio kas naelektaran nga auxiliary bishop ti Nueva Segovia.#