STA. CRUZ, Ilocos Sur – Uray appraiser ti alahas, naballaibo ti Budol-Budol Gang ditoy nga ili itay nabiit.
Nagpulong iti polis ditoy ni Sally Ganopao, 47, naasawaan, residente iti Barangay Bagani Campo, Candon City, a linoko ti maysa a lalaki ken babai a mapapati a kameng ti Budol-Budol Gang.
Segun ken ni Ganapao, simrek dagiti suspek iti pawnshop a pagtrabahuanna kas appraiser iti agarup alas 9:40 ti aldaw ket inyam-ammoda ti bagida a kas Ariel Mendoza ken Maricel P. Torres sada insalda ti tallo a singsing.
Pinatgan ni Ganapao a maisalda dagiti alahas iti P5,215.00.
Idi nakapanawen dagiti suspek, inamiris a naimbag ni Ganapao dagiti alahas ket natakuatanna a peke gayam dagitoy.
Nagturong dagiti polis iti adres nga imbaga dagiti suspek ngem negatibo ti panagsapulda.#