Aramid, saan a ngiwat, ti pakakitaan

Nalaing nga agkari ni Davao City Mayor Rodrigo Duterte, kandidato para presidente. Posible nga iti panagbayag ti kampania, ikarina payen a sukdalenna dagiti bituen tapno iburaisna a silaw a mangakay kadagiti umili iti panagturongda iti naraniag a masakbayan.

Immuna, indeklara ni Duterte ti panangirusatna iti all-out war kontra iti droga tapno mapugipog ti kagudua kadagiti agarup tallo ribu-lima ribu a drug lords.

Kinuna ni Duterte a saan nga agaripapa a mangusar iti militar ken polis ken mangipakat iti extraordinary powers ti presidente tapno mapasardeng ti problema ti droga iti pagilian.

Inkarina a no isu ti presidente, mapugipog ti droga iti uneg ti tallo agingga iti innem a bulan. Uray ti korapsion ken kriminalidad, saan a nakalasat iti natadem a dila ti kandidato a para presidente.

Kas sungbatna iti panangatake ti Bangsamoro Islamic Freedom Fighters (BIFF) iti Central Mindanao a nakatayan ti agarup 10 a sibilian, kinuna ni Duterte a nayonanna iti 3,000 regular men ti armed forces sana pagsanayen ida kas scout rangers wenno special forces a makirupak kadagiti elemento a di mangikaskaso iti linteg.

Kinuna ni Duterte a natureden dagiti kriminal isu a masapul a “matapang” met ti solusion.

No dida latta mangitaltalek iti baet dagiti maipaay a pangpadur-as iti ekonomia, desentralisasion, ken nademokratikuan a panagituray, impangta pay ni Duterte a sanguenna ida ken anupenna ida ta dina kayat a kumarkaro pay ti panagsagaba dagiti tattao.

Ket itay Baro a Tawen, inkarina a magun-od ti kappia iti pagilian iti uneg ti tallo agingga iti innem a bulan no isu ti agbalin a presidente.

Ti saludsod: kagaten ngata dagiti umili dagitoy natatangken a pakdaar ni Duterte?

Kastoy la kadin ti kinanengneng dagiti umili, kangrunaan dagiti botante a mangsikbab iti maiyappan iti ngiwatda?