ITI KONBENSION nasional a dinar-ayan dagiti dadaulo dagiti nadumaduma a partido a kaaliado ti agdama nga administrasion, imbatad ni Pres. Arroyo ti masirmatana a panagballigi dagiti kandidatona iti masungad nga eleksion.
Impasingked met dagiti lokal nga opisial iti 12-0 para kadagiti senatorial candidates ti Team Unity.
No patien dagitoy lokal nga agtuturay, adda kadakuada ti bael a mangallukoy kadagiti botante iti hurisdiksionda a mangibutos kadagiti kandidato ti administrasion.
Mabalin a pudno, ngem ad-adda a patienmi a maysa laeng daytoy a panagar-arapaap a simamata. Mabalin ketdi a pammatiray-ok daytoy tapno lumag-an ti rikna dagiti senatorial candidates nga agab-abog iti lumba iti politika kas iwarwaragawag dagiti nadumaduma a surbey.
Ibagada la ketdi dagiti maar-arus a kandidato a palso wenno pagduaduaan dagiti surbey, ken depende no asino ti agpasurbey.
Ngem saan a mabalin a tagibassiten lattan dagitoy agsipud ta, annugotenda man wenno saan, pakarukodan iti sangkapirgis a rikna, kapanunotan ken pagirigan ti maysa a paset ti nadumaduma a sektor dagiti umili.
Kas nasaon iti kallabes, agbalin daytoy nga eleksion a barometro ti administrasion no nagun-odnan ti panagtalek dagiti umili kalpasan dagiti ibanbandona a nagapuananna a panagdur-as iti ekonomia.
Ngem ti saludsod: nakadanon kadin dayta a panagdur-as kadagiti umili?
Kadagiti probinsia, adu dagiti umili ti saan a mapnek iti nagapuanan dagiti lokal a mangituray kadakuada. Awan ti ania a nagbaliwan ti panagbiagda.
Ta saan a malibak nga adu nga agtuturay ti nagsaksaklot lattan iti tianda idinto a naipaidam kadagiti iturayanda dagiti kangrunaan a kasapulanda iti biag kas iti dakdakkel a matgedan, nalaklaka a magatang a tagilako, ad-adu a panggedan ken dadduma pay a pakapalag-anan ti panagbiagda.
Adda ketdi dagiti alegasion a nailayonda iti puesto agsipud ta nagayus ti kuarta a pinangliwliwda kadagiti botante ken babaen ti pammutbuteng dagiti armado a pasurotda ken panagsuitik iti eleksion.
Masinunuo ngarud a no maipangabak man dagiti lokal nga agtuturay dagiti senatorial candidates kas iti inkarida a 12-0, saan a gapu ta aglaplapusanan ti talek dagiti kailianda no di iti babaen laeng iti wagas a kas iti nadakamat iti ngato.
Ti ketdi nalawag, adu a rigat ti administrasion a nagallukoy kadagiti kandidatona a para senador iti baet a dakkel a bentahe ti makinariana a mangibayog iti kandidatura dagitoy.
Pammaneknek daytoy iti panangallawat ti administrasion kadagiti kandidato a napeklan a kritiko ti turay iti laksid nga adu dagiti pagpilianna a kaaliadona. Team Unity (kuno) para iti panagmaymaysa ken panagkaykaysa para iti panagdur-as ti pagilian. Ngem ad-adda a nakappapati nga adu dagiti inawagan ken inay-ayo ti administrasion nga agkandidato ngem nagsarimadeng ken nagpakni dagitoy.
Ngarud, annugoten man wenno saan ti administrasion ken dagiti kaaliadona a lokal nga agtuturay, kaarig kidkiddawenda ti bulan iti panangibagbagada a simotenda ti para senador iti unay nga eleksion.
