VIGAN CITY – Iti pagbaludan ti nakaikursongan daytoy lalaki kalpasan a tiniliw dagiti polis gapu ta agwarangwarang iti kalsada a nakaiggem iti paltog sadiay Jose Singson Street, Barangay VIII ditoy siudad idi rabii ti Disiembre 2.
Nagresponde dagiti polis iti nasao a barangay kalpasan a nakaawatda iti report manipud iti maysa a residente nga adda lalaki a nakapatnga iti kalsada a nakaiggem iti paltog.
Idi makita ti suspek dagiti polis, imbatona ti paltogna iti laud a paset ti kalsada sana pinanggep ti aglibas ngem kinamat dagiti polis agingga iti naipiskotda daytoy.
Mapapati nga adda bunggoy ni Cariaga a naglugan iti dua a motorsiklo ngem nagsardengda iti tengnga ti kalsada ket inruar ti suspek ti paltogna a maysa a cal. 9mm pistol nga Smith & Wesson nga adda magasinna a nagkarga iti tallo a bala.
Naipatulod ti paltog iti crime lab para iti pannakaeksamenna.#
