SAN JUAN, Ilocos Sur – Dua a lalaki ti ginudas dagiti armado a tattao iti nagsaruno a pammaltog a naisayangkat iti Magsingal ken ditoy nga ili idi Abril 11 ken 12.
Agpada da Ernesto Briones y Tadeo ken ni Deomedes Wilfredo Alvarez y Bonifacio a naideklara nga awanen ti biagda idi maidanonda iti ospital kalpasan ti pannakapaltogda.
Iti inisial nga inbestigasion ti polis, naammuan a madama a gumatgatang iti prutas iti uneg ti pagpallotan iti Barangay Lapting ditoy nga ili ni Briones, 51, naasawaan ken residente iti Barangay Nagsuputan, idi inasitgan ti maysa a lalaki a nagaruat iti short pant a kolor kayumanggi, kalkalaingan ti kababagina, agtayag iti 5’2” ken nakakallugong iti natangken nga asul ken nakadiaket met laeng iti natangken nga asul sana pinaltogan ti biktima iti sumagmamano a daras a nagsagrapan daytoy kadagiti sugat iti nadumaduma a paset ti bagina.
Naitaray ni Briones iti Suero Clinic and General Hospital ngem saanen a naiyabut a sibibiag pay.
Mapapati nga adda kadua ti di pay nabigbig a suspek a nagpaay a lookout ken nagmaneho iti getaway a motorsiklo.
Nakarekobre dagiti inbestigador iti 6 a kapsula ken maysa a deformed slug a nagtaud iti cal .45 iti crime scene.
Di pay ammo ti motibo ti pammaltog.
Kabayatanna, nagtaud met laeng iti cal .45 ti paltog a naaramat iti pannakapapatay ni Alvarez, 54, baro, karpintero ken residente iti Barangay Pagsanaan Sur, Magsingal idi agarup alas 7:55 ti rabii ti Abril 11.
Agdaldaliasat iti provincial road iti Barangay Bacar, Magsingal ni Alvarez, kalugan ti live-in partnerna a ni Belen Yacap y Pechay, 47, dati a residente iti Barangay Sta. Monica ngem agdama nga agnaed iti Barangay Pagsanaan Sur, idi pinaltogan dagiti di nabigbig a suspek a nagkalubbon iti nalabbaga a motorsiklo.
Segun iti report, idi makagteng ti biktima iti nakapasamakan ti krimen, kinamat dagiti suspek ket idi makaasidegda, pinaltogan ti maysa kadagiti suspek ti biktima iti sumagmamano a daras a nakapuntaan ti ulo, babaen ti lapayag, tengnged, abaga, pingping, kilikili, takiag ken tian daytoy.
Nailadawan dagiti suspek a nagaruat iti kayumanggi a short pant, nakatisirt iti agduma a kolor ken nagaruat iti bull caps.
Lima a kapsula ken maysa a deformed nga slug ti nasarakan dagiti inbestigador iti crime scene.
Iti pannakaisurat daytoy, madama ti panagimbestiga dagiti polis no ania ti motibo kadagiti nasao a pammapatay.#