Armado a riding in tandem. gimmudasda manen

VIGAN CITY – Kitkitaen dagiti pannakabagi ti linteg no adda pannakainaig iti droga ti pannakapapatay ti maysa a lalaki sadiay Barangay VI idi malem ti Mayo 11.

Daytoy ti anggulo a kitkitaen dagiti inbestigador kalpasan a nakasukain dagiti polis iti short pant ni Enrique Patao III y Quitoriano, 37, naasawaan, ken residente iti Barangay Aggay, Bantay, Ilocos Sur iti dua a heat sealed plastic sachet a nagkarga iti mapapati a shabu, ken 6 a plastic sachet para repacking,

Napaltogan ni Patao sadiay Diego Silang, Barangay VI, Vigan City idi agarup 2:35 ti malem ti Mayo 11 babaen ti dua a lalaki a nagkasakay iti motorsiklo.

Naitaray ni Patao III iti Gabriela Silang General Hospital ngem indeklara ti doktor a nangtaming kenkuana a dead on arrival gapu kadagiti sugat a sinagrapna gapuen ti pannakapaltogna.

Saan pay a nabigbig dagiti nangpaltog ken ni Patao a naglibas iti laud a direksion a nakalugan iti di ammo a motorsiklo.

Segun iti panagimbestiga dagiti nagresponde a polis, napan intulod ni Patao ti girlfriendna a ni Marian Antonette Alquiza Baquiran, 17, ken residente iti Barangay VI, Vigan City, ket idissaagna koma ti balasang idi kellaat nga immasideg manipud iti likudan ti dua a lalaki a naglugan iti motorsiklo ket pinaltoganda ni Patao iti sumagmamano a daras.

Nagsagrap met ni Alquiza iti sugat iti makannawan a takiagna gapu iti naiwawa a bala.

Nakarekobre dagiti inbestigador iti lima a kapsula manipud iti Cal. 45 ken maysa a naiputok nga slug manipud iti Cal. 45 iti nakapasamakan ti krimen.

Iti met panagsukimat dagiti polis iti kotse ni Patao, nakasarakda iti maysa a cal. 45 nga awanan marka ken 5 a bala a naikarga iti tunggal cylinder, maysa a digital weighing scale, Samsung cellular phone ken maysa a disposable lighter.

Malaksid iti dua a heat sealed plastic sachet a nagkarga iti mapapati a shabu, ken 6 a plastic sachet para iti repacking, nakarekobre pay dagiti polis iti short pant ni Patao iti 5 a tig-P20.00; 2 a tig-P100.00; 2 a tig-P1,000.00; 6 a P1.00; 2 a P5.00, ken selpon a Nokia.

Sinaksian ti ikit ni Patao a ni Ermelina Villanueva, pannakabagi ti Bombo Radio a ni Fernando Berina, ken Dr. Mark Anthony Cuevas ti pannakainbentario dagiti nasukimat iti lugan ken short pant ti biktima.

Daytoy ti maikatlo a kaso ti pammapatay iti siudad ti Vigan.

Idi¬¬¬¬ Abril 25, pinapatay dagiti lalaki a nagkalubbon iti motorsiklo ni Mark Anthony Aludino Rapirap, 29, ken residente iti Barangay III, ditoy siudad iti sanguanan ti Simbaan a bassit a masarakan iti Liberation Boulevard, Barangay VIII.

Dua aldaw sakbayna, idi malem ti Abril 23, napaltogan ni Joseph Arizabal y Alonzo, 48, naasawaan, ken residente iti Zone 6, Bantay, Ilocos Sur, bayat nga agdaldaliasat ti traysikelna iti Rizal Street, Barangay IV, amiananen laeng ti Iglesia ni Cristo, babaen dagiti di nabigbig a suspek a naglugan iti motorsiklo.#