Armado a tattao riding in tandem, nanggudas manen

MAGSINGAL, Ilocos Sur – Sabali pay ti nagbalin a biktima iti pammaltog a gapuanan dagiti armado a tattao a nagkalubbon iti motorsiklo.

Naideklara nga awanen ti biag iti Magsingal District Hospital a nakaitarayanna ni Romeo Battad y Ramos, 47, naasawaan, natibo ti Barangay Namalpalan ngem agdama nga agnaed iti Barangay Sta. Monica gapu kadagiti grabe a sugatna iti makannigid a pispisna ken makannigid a pingpingna.

Naammuan manipud iti report ti polis a bayat ti panagdaliasat ti motorsiklo a minaneho ni Battad iti Barangay Bungro, ditoy met la nga ili, pinaltogan ida dagiti suspek a naglugan iti motorsiklo iti likudan a nagsagrapan ti biktima kadagiti sugatna.

Nasugatan met ti kannigid nga ima ti kalubbon ni Battad a ni Elizer Constante Villalon y Salvador, 51, balo, ken residente iti Barangay San Basilio, Magsingal.

Iti follow-up nga inbestigasion dagiti polis, kinuna ni Villalon a dina nailasin dagiti suspek agsipud ta nakausar dagitoy iti helmet.

Kasta met ti imbaga ti sabali pay a saksi nga agdaldaliasat met iti nasao a lugar idi mapasamak ti pammaltog.

Nakarekobre dagiti polis iti tallo a kapsula a nagtaud iti cal .45 iti nakapasamakan ti pammaltog.

Naipatuloden dagiti inbestigador dagiti tallo a kapsula a nagtaud iti cal .45 a nasarakan iti nakapasamakan ti krimen iti police crime lab iti Barangay Bulag, Bantay, Ilocos Sur .

Di pay ammo ti motibo ti pammapatay.

Kabayatanna, sabali pay a pammaltog ti naisayangkat iti kalsada ti barangay ti Suagayan, Sta. Lucia, Ilocos Sur a nakagudasan ti maysa nga agpaspasada iti traysikel idi agarup alas 6:00 ti bigat ti Disiembre 13.

Segun iti report a dimmanon iti provincial police office, napaltogan a puon ti naka-tayanna ni Pablo Habon y Raqueno, 44, naasawaan, tri-cycle driver, ken residente iti Barangay Quinabalayangan, Sta. Lucia, Ilocos Sur.

Iti inisial nga inbestigasion dagiti polis, mapapati nga agdaldaliasat ti traysikel ti biktima iti nadakamat a kalsada idi pinaltogan dagiti di nabigbig a tattao a nagsagrapanna ka-dagiti sugat iti nadumaduma a paset ti bagina a nakatayanna a sigida.

Nakarekobre dagiti inbesti-gador iti dua a kapsula iti na-kapasamak ti krimen.

Di pay ammo ti motibo ti pammapatay.#