Armado a tattao riding in tandem, nangiwayat pammaltog iti Galimuyod, Magsingal

GALIMUYOD, Ilocos Sur – Dua manen a pammaltog ti nagsina a naisayangkat iti Magsingal ken ditoy nga ili a nakatayan ti maysa ken grabe a nakasugatan ti sabali idi Hunio 27 ken 28.

Pimmusay ni Jonathan Vidal y Obillo, 33, naasawaan, mannalon, residente iti Barangay Nagsingcaoan, ditoy nga ili iti Candon City Hospital a nakaitarayanna gapu kadagiti sugatna iti nadumaduma a paset ti bagina.

Segun iti report manipud iti polis ditoy nga ili, magmagna ni Vidal nga agpaabagatan a nakabaklay iti kawayan idi kellaat a nagparang ti dua a tattao a nakalugan iti motorsiklo ken nakabonite sada pinaltogan ti biktima iti sumagmamano a daras.

Mapapati a naglibas dagiti di nabigbig a suspek a nagpalaud a direksion.

Nakarekobre dagiti nagresponde a polis iti nakapasamakan ti krimen iti dua a kapsula a mapapati a nagtaud iti cal .45.

Di pay ammo ti motibo ti pammapatay.

Kabayatanna, sabali pay a shooting incident ti napasamak iti Barangay San Vicente, Magsingal, Ilocos Sur idi  parbangon ti Hunio 27 a nakapaltogan ti maysa a barangay tanod.

Nagresponde dagiti polis kalpasan ti panangireport ni Dr. Elaine Guerrero ti pannakapaltog ni Arnold Viloria y Layugan, 46, naasawaan, barangay tanod, mapapati a naideportar manipud iti California, ken residente iti Barangay San Vicente, Magsingal.

Naammuan iti inisial nga inbestigasion dagiti polis a magmagna ti biktima iti kalsada ti nadakamat a barangay idi agarup ala una ti parbangon ti Hunio 27 idi pinaltogan dagiti di nabigbig nga armado a tattao a naglugan iti motorsiklo.

Nagsagrap ti biktima iti sugat iti tianna ket intaray ti kabsatna a ni Marcelino iti Magsingal District Hospital sada inyalis iti Gabriela Silang General Hospital iti Vigan City.

Iti pannakaisurat daytoy, saan pay nga ammo ti motibo  ken ti kalibre ti paltog a nausar iti pammaltog.#