SINAIT, Ilocos Sur – Soldado dagiti nangisayangkat iti krimen wenno nanglimlimoda?

Daytoy ti palpalutpoten dagiti polis ditoy mainaig iti pammapatay a napasamak iti Barangay Nagculluoban, ditoy.

Napapatay ni Jerry Jimmy Igne, 37, naasawaan, residente iti Barangay Nagculluoban ditoy ket soldado dagiti masuspetsa a nangpapatay kenkuana.

Iti inisial a panagimbestiga ti polis, naammuan nga agin-inana ti biktima iti balitang iti pagtaenganna idi simrek ken pinaltogan dagiti di pay nabigbig nga armado a tattao a nakakawes iti uniporme ti soldado.

Nagudas a sigida ti biktima gapu iti sugatna iti kannigid a paset ti bagina.

Nakarekobre dagiti polis iti lima a kapsula manipud iti M-16 ken 4 kapsula manipud iti M-14 iti crime scene.

Sakbay a pimmanaw dagiti suspetsa, innalada ti wallet ken selpon ti biktima.

Kinuna ni Jocelyn Igne, tallo a tattao nga impagarupna a soldado ta nakasuotda iti camouflage nga  uniporme dagiti simrek iti balayda.

Palpalutpoten dagiti polis no adda pannakainaig ti krimen iti pannakapapatay ti maysa a barangay official iti Barangay Maradudon a mapapati a kameng ti New Peoples Army dagiti nangisayangkat.