Footer

Armado a lalaki, ginandatna a patayen ti kaarrubana

CAOAYAN, Ilocos Sur – Malaksid a nakabil daytoy suspek, posible a makasuan pay gapu iti iseserrekna iti balay ti kaarrubana a nanggandatanna iti biag daytoy idi rabii ti Mayo 28.

Kuna ti polis a nabartek ti suspek a ni Cirilo Tugade y Pupa, 57, awanan asawa, ken residente iti Barangay Anonang Mayor ditoy nga ili, idi sinerrekna ti balay ni Ace Tugade y Quiba, 28, naasawaan, empleado ti Metro Vigan Water District ken nangtagbatanna iti biktima.

Kas maibatay iti journal, aggiinom da Ace Tugade ken maysa a Mark Patrick Garduque y Quicio, 27, naasawaan, construction worker ken kalugaranna met laeng iti uneg ti balayna idi kellaat a simrek ni Cirilo Tugade a nakaarmas iti bolo sana kinarit ida.

Pinadas ni Ace Tugade a pagtalnaen ti suspek ngem tinagbat ketdi daytoy a nakadunoran ti imana.

Bimmales ti biktima ken ni Garduque ket kinabilda ti suspek a nakadunoran ti rupana.#