Armalait, balbala, boluntario a naisuko iti polis

SINAIT, Ilocos Sur – Boluntario nga insuko ti maysa a lumugar iti Barangay Pug-os ditoy nga ili dagiti armas ken balbala kadagiti nagtitipon a bunggoy dagiti polis maysa nga aldaw sakbay ti pannakaangay ti special election a pakabutosan iti diputado iti umuna a distrito ti Ilocos Sur.

Boluntario nga insuko ni William Arthur, residente iti Barangay Pug-os ditoy nga ili ti maysa a depektibo nga armalite rifle Elisco, maysa nga atiddog a magazine assembly, ken 18 rounds a live ammunitions ti m16 rifle kadagiti nagtitipon nga elemento ti CIDT, ISPPSC, Bulag, Bantay, Ilocos Sur ken polis ditoy nga ili.

Sakbayna, mapapati a di kayat ni Arthur a pasukisok ti balayna iti baet nga adda impakita ti search team a search warrant nga inyisio ni Judge Francisco Ante, Jr. agsipud ta nakalanad iti search warrant ti adresna a Barangay Pug-os, Cabugao idinto a Barangay Pug-os, Sinait ti lugar a pagnaedanna.

Nupay kasta, boluntario nga insuko met laeng ni Arthur ti armasna ken balbala kadagiti agsukisok koma a polis.

Kabayatanna, naipilan iti provincial prosecutor’s office iti Vigan City ti kaso a panagsalungasing iti PD 1866 kas inamendaran ti RA 8294 maikontra ken ni Sammy Yadao Villegas gapu iti panagikutna iti maysa a homemade buckshot nga addaan cartridge case para 12 gauge.

Maipalagip a nga idi agarup ala 1”30 ti bigat ti Mayo 26, nagprobokar ni Yadao iti Barangay Catucdaan ken mapapati a binunotna pay ti paltogna sana binutbuteng ni Darwin Serrano a namkuatan dagiti barangay tanod a nangkamat kenkuana ken nangkumpiska iti paltogna.#